Qezaya Soderhamnî ya Swêdî de wendekarê di dibistananê verênan seba keyeyanê Amedî yê ke vîrusê Korona înan rê tesîrêko giran kerd, çarçewa kampanyaya dostanîye de xîret kenê ke 20 hezar kronî kom bikerê.
Soderhamn qezaya qijkeke ya vakurê Swêdî ya. Wendekarê di dibistanan ê verênan ê Vågbroskolan ve Stenbergskolanî seba ke hetkarîye bidê 10 keyeyanê Amedî yê ke prosesê vîrusê Korona de teng bîyî, seferber bîyî.
Wendekarî rojêka hewteyî de axpînan de kargehan de karê pakîye kenê û pê pereyê nê karan paştî danê kampanya. Peynîya kampanya de pereyo ke do bêro komkerdene seba 10 keyeyanê Amedî do bêro erşawitene.
Felicia Anderssona ke rojnameyêkê herêmî yê qeza de xebitîyena, xîretê paştdayîşî yê wendekaran ê seba şarê kurdî vist rojdem.
Wendekaran ra Rawan Radhisonî rojnameyî reyde qisey kerd û vat: ''Seba mi zaf manadar o ke ez seba merdimanê hewcedaran xebitîyena.''
Wendekara sinifa 8. Alma Hansson axpînanê Tronoyî de xebitîyena. Alma vat: ''Goreyê mi zaf girîng o ke merdim hetkarîya merdiman ê binan bikero.''
Rojnameyî îfade kerd ke kampanyaya paştdayîşî ya seba şarê Amedî hetê Komîteya Paştdayîşî ya Kurdîstanî û Înîsîyatîfê Soderhamnî ra dîyaye destpêkerdene.
