Meseleyê mexduranê erdlerzê Xarpêtî dewam kenê. Erdlerzî ra dima zaf hemwelatîyan neçare mendî ke Xarpêt biteriknê. Hemwelatîyê ke qerqilîyenê û nêwazenê şorê keyeyê xo teber de manenê. Xarpêt de ke hewa zaf serd o mesela germbîyayîşî zî dewam kenê. Hemwelatîjî bi visnayîşê kartonan û texteyan kenê ke qerm bibê.

Hemwelatîyî şewan Parka Kulturî ya Şaredarîya Xarpêtî de manenê. Parke de hetê Kizilay û AFADî ra 300 xeymî ameyî ronayene la xeyma bi 6 kesan de 11 kesî manenê. Xeymeyan de germker çin o û betanîyayî zî nênê dayene mexduranê erdlerzan.

Mîne Kumaroya ke dadîya 3 domanan a û xeyme de manena îfade kerd ke seba ke keyeyê aye de texrîbat esto nêeşkena şora keyeyê xo. Kumaro 3 rojan ra nata teber de manena û bale ante mesela germbîyayîşî ser. Kumaro vat: Seba ke xeymeyan de germker çin o heta serê sibayî ma verê adirî de vindenê. Serdî ra ne ma ne zî domanê ma eşkenê rabikewê. Domanê ma bîyî nêweş.''

Zuhtu Kardeşler zî 2 rojanê destpêkan de camî de mend. Kardeşlerî vat: "Ez ameya ke xeyme bivîna la çin a. Ez bi keyeyê xo teber de ya û nêzanena ke do se bibo.''

Mexdurê erlerzî Yusuf Çetînî zî vat: "Ma na xeyme de 11 kesî manenê û têna 5 betanîyayî ameyî dayene ma. Ma bêçare pawenê."

Handane Çetîn zî eşkera kerd ke serdî ra 3 domanê ci bîyî nêweş û vat: "Ma bi ambulansî domanê xo erşawitî nêweşxaneyî. La pereyê ma çin ê ke ma derman bigêrê. Tersî verî ma nêeşkenê şorê keyeyê xo zî. Keyeyê ma kîra yo, mêrdeyê mi 750 TL meaş gêno ke ma nêeşkenê pê debarê xo bikerê. Ez seba werdî kewena dore la heta ke dore yena mi vanê werd qedîya. Ma emşo nêeşkîyayî werd bigêrê."