Zîndanan de binpaykerdişê heqanê tepişteyan bi zêdbîyayîş dewam kenê. Na rey zî xeberê binpaykerdişê heqan Zîdanê Xarpêtî û Zîndanê Bedlîsî ra ameyî. Tepişteyan û merdimanê înan da zanayene ke dermanê nêwaşanê tepişteyan nêdîyeno înan û zextê serê înan dewam kenê.

Xarpêt

Tepişte Mehdî Bozî Zindanê Xarpêtî ra nameyêk erşawit Ajansê Mezopotamya û binpaykerdişê heqanê zindanî ser o nuşt. Bozî îfade kerd ke nêweşîya xo ra semed ganî lepik bixebitno la seba ke lîsteya hacetanê destûrkerdeyan ê zindanî de lepik çin o ame qedexekerdene. Bozî nuşt ke kitabê Cuneyt Kahramanî yê bi nameyê ''yarali Yurekler'' bi îdîaya ''teşwîqkerdişê serewedaritişî û propagandaya rêxistine'' nêno dayene. Tayê binpaykerdişê heqanê merdiman ê ke Bozî nameyê xo de behsê ci kerdî wina yê: weşan û çapemenîya sosyalîste nênê dayene, wextê zîyaretî yenê kêmkerdene, tay dermanî nênê dayene û peydakerdene.

Bedlîs

Tepişteyê Zindanê Bedlîsî Huseyîn Guducu zî nêweşê qeseba sîyaye yo ke nêno weşkerdene. Hîrê cayanê cîyayanê Guducuyî de hemonjîomî (tewirêkê tumorî) estê. Lajê ci Bariş Guducuyî îfade kerd ke babîyê ci ame berdene bi Nêweşxaneyê Cigêrayîşî û Perwerdeyî yê Zanîngehê Înonu yê Meletî la ne weşkerdişê ci ame kerdene ne zî dermanê ci ameyî dayene. Bariş Guducuyî vat: "Wexto ke babîyê mi ame tepiştene mi îdareyê zîndanî rê rewşa ci vate. Înan zî mi rê va ke ma do ey weş bikê. Babîyê mi ame erşawitene bi Nêweşxaneyê Zanîngehê Înonu la uca de kesêk eleqa nêmojna ci. Dima ame berdene bi zindanî. Reçeteyê ci zî bi zanayîşî Meletî de ame verdayene. Ez dima şîya mi uca ra girewt. Ganî babîyê mi bêro amelîyatkerdene la seba ke nêweşxane de 'odaya tepişteyan' çin a nêwazenê babîyê mi amelîyat bikê."

Guducuyî pare kerd ke dermanê ke 23ê kanûne de erşawitî zindanî hema nêameyîdayene babîyê ey Huseyîn Guducu û vat: "Dermanî depoyê zindanî de yenê tepiştene. Nêweşîya babîyê mi cidî ya. Ganî dermanê ci bêrê dayene û cade sewqê nêweşxaneyî bibo ke bi hawayêkê raştî weşkerdişê ci bêro kerdene."