Çewlîg: Seba ke destûr nêdîya, eşkerayîye pencera ra ameye dayene

Çewlîg de rêxistina HDPyî waşt ke derheqê grevê vêşanîye yê tepişeyan de eşkerayîye bide. Seba ke polîsan destûr nêda, eşkerayîye pencera ra ameye dayene.

Rêxistina HDPyî ya Çewlîgî derheqê kongreya xo ke do bêro kerdene de kombîyayîşêk kerd.  Badê kombîyayîşî ame waştene ke verê banê partîye de derheqê grevê vêşanîye de eşkerayîye bêro dayene la polîsan destûr nêda. HDPyîjan eşkerayîye penceraya banê partîye ra daye.

Kombîyayîş de Emdanê Meclîsê Partîye yê HDPyî Murat Aydinî bale ante hêrişanê vera partîye înan ser û semedê wayîrvejîyayîşê veng da.

Badê kombîyayîşî ame waştene ke verê banê partîye de derheqê grevê vêşanîye yo ke vera tecrîdê serê Rayberê Şarê Kurdî Abdullah Ocalanî yeno kerdene de eşkerayîye bêro dayene la polîsan destûr nêda. Nayî ser o Endama Meclîsê Şaredarîye yê HDPyî Songul Barça pencraya banê partîye ra eşkerayîye wende. Barça bale ante şertenê zehmetan ê zîndanan ser û  ard ziwna ke tecrîdê Îmraliyî heme welatî ra bîyo vila. Barça veng da Wezîrîya Edaletî ke wa tecrîd cade bêro wedaritene û waştişê tepişteyan bêrê caardene.