Çîftyurek: Ganî Kurdî vera qeyûman bibê yew

Serekê peroyî yê KKP’yî Sînan Çîftyureko ke derheqê şaredarîyanê ke ameyî xespkerdene de qisey kerd vat ganî çar parçeyanê Kurdistanî de Kurdî hemverê nê îşxalî de bibê yew.

Vera xespkerdişê hîrê şaredarîyan ê ke hetê rejîmê AKP-MHP’yî ra ameyî îşxalkerdene razînêbîyayîşî dewam kenê. Xeylî hetanê cîya-cîyayan ra mesajê paştdayîşê HDP’yî yêne. Serekê peroyî yê Partîya Komunîste ya Kurdîstanî Sînan Çîftyurekî derheqê  xespkerdişê şaredarîyan  de qisey kerd.

Çîftyurekî bale ante muhîmîya yewbîyayîşê Kurdan ser û  va: ‘’Ganî çar parçeyanê Kurdistanî de Kurdî hemverê nê îşxalî de bibê yew. Kurdî senî ke vera îşxalê Kobanê, Efrîn û Kerkukî bîyî yew û vejîyayî kuçeyan, ganî ewro zî vera qeyûman yew bê û vejîyê meydanan. AKP xo sey dewlete name keno û wazeno ke goreyê qanûnê xo Kurdan dîzayn bikero. Serekê ke Kurdan vîjnayî înan nas nêkenê. Xora înan eşkera va. Qanûnanê xo zî binpay kenê. AKP 17 serrî yo di referansanê bingeyênan ano ziwan: Vanê îredeyê şarî her çî ra verê yeno û vanê ke ê derbeya leşkerîye û sivîle qebûl nêkenê. La 17 serrî yo nînan vera Kurdan şuxulnenê. Îradeyê Kurdan nas nêkenê û reya dîyin a ke vera îradeyê şarê Kurdî derbeya sivîle kenê. Şarê Kurdî naye do qebûl nêkero. Ma partîyê Kurdistanî ameyî têhet. Kombîyayîşê ma do dewam bikerê. Ma do bi qeraranê hemparan heta peynî mucadeleyê xo yê demokratîk û meşrû rê dewam bikerê.’’