Avûkatanê Buroyê Huqûqî yê Asrinî bi wesîleya serrgêra Komployê 15ê Sibate yê vera Rayberê Şarê Kurdî Abdullah Ocalanî Îstanbul de eşkerayîyêke daye. Parlamenterê HDPyî, îdarekarê KCDyî, THÎV, ÎHD, OHDyî zî tewrê eşkerayîye bîyî.

Kombîyayîş de verê avûkat Rêzan Sarica qisey kerd. Saricayî vat: ''Birêz Ocalanî semedê haştîyêka bianore projeyî kerdî hazir û tim semedê haştîye veng dano la bi polîtîkayanê hesabdaran waştişê ey yenê redkerdene. Dewleta tirke ya problemê kurdî çareser nêkerd ewro demokrasî xo vîr ra kerda. Şarî bi problemanê komelkî û ekonomî fatisyenê. Rojhelatê Mîyanênî de kaos, krîz û şerî estî. Ameyoxê şarî yeno diznayene. Nizdbîyayayîşê brêz Ocalanî û çîyê ke Tirkîya û Rojhelatê Mîyanênî de yenê ciwîyayene pabesteyê yewbînan ê. Birêz Ocalanî vera mergî  tim ciwîyayîş paweno. Tewr peynî de reyna bi deklarasyonê yê 7 madeyan no ramojna. Ma no bi şarî  pare ked la no vengdayîş zî hete dewlete ra nêvînayîş ra ame û bi xorîkerdişê tecrîdî cewabê ci dîya. Ma veng danê dewlete, hukmatî, Wezaretê Adeletî wa tecrîdê Îmraliyî cade sey mende bêro wedaritene. Wa dezgehê demokratîke, sivîl û heqanê merdiman vera tecrîdî vengê xo vejî û têkoşîn bikerê. Şar zî ganî vera tecrîdî hîsar bo.''

Sereka Pêroyî ya Weqfa Heqanê Merdiman a Tirkîya (TÎHV) Prof. Dr. Şebneme Korur Fîncanci zî tecrîd sey sûcê merdimîya name kerd û vat: ''Tecrîd problemêkê weşîye yê şarî  yo û ganî çarçeweya îşkenceyî de bêro destgirewtene. Tecrîdê Îmrali ganî cade bêro wedaritene.''

Hemserekê Komeleya Heqanê Merdiman (ÎHD) Ozturk Turkdoganî ard ziwan ke Tirkîya de prosesêkê haştîye yê neweyî rê hewcedarîye esta û vat: ''Rayîrê haştîye Abdullah Ocalanî ra ravêreno coka ganî cade tecrîd bêro wedaritene.''

Hemsereka Komeleya Huqûqnasan ê Seba Azadîye avukate Ayşe Acinikli zî  tecrîd sûcê merdimîye hesibna û vat: ''Ma çewî ra tolerans nêwazenê wa huqûq bêro şuxulnayene.''

Hemsereka KCDyî û wekîla HDPyî Leyla Guven a ke  semedê wedaritişê tecrîdî 200 rojî grevê vêşanîye yê bêdem bêagêrayîşî de mend nê vatî: ''Heta ke meseleya kurdî çareser mebo problemê bînî çareser nêbenê. Birêz Ocalan merdimo tewr girîng û krîtîk o ke probleman çareser bikero. Rojawan de şorişê cinîyan esto. Cinîyan û şaran cuyeya hempare naya ro, pîya ciwîyene. Seba naye vera birêz Ocalanî  tecrîdo giran yeno caardene. Ganî no tecrîd cade bêro wedaritene. Ciwananê ke vat 'Ocalan rayberêk o ma çînbîyayîşî ra afernayê ' semedê wedaritişê tecrîdî ganê xo da. Gama ke ma grev de bî merdimanê erjayeyan ma zîyaret kerd û vatêne 'şima grevê cavêrdenê memirê, ma do semedê wedaritişê tecrîdî rayîrêko bînî vînê.' Ma ewro vanga înan danê bêrê ma pêro pîya tecrîdî bişiknê.Tecrîd hema dewam keno. Birêz Ocalan ganî azad bo.  Wa çew derheqê tecrîdî de xo mexapîno, heme komel binê tecrîd de yo. Eke tecrîd bêro wedaritene heme komel do nefesêk bîgêro.''