Colemêrg de krîzê ekonomîkî esnafî kerdî deyndar

Esnafanê Colemêrgî pare kerd ke eke rewşa ekonomîke wina şora Tirkîya do birija. Esnafan ard ziwan ke ê rîyê krîzê ekonomîkî ra binê deynan de mendî.

Colemêrg de ke şer tira nêkêmîyeno bêkarî zî ho asta tewr berze de ya. Se ra 85 ciwanê Colemêrgî bêkar ê. Esnafê Colemêrgî binê tesîranê krîzê ekonomîkî de kenê ke debarê xo bikerê. Krîzê ekonomîkî de xeylêk esnafan dikanê xo padayî. Esnafî nêeşkenê deynanê xo bidê û bi desan esnafî verê îcra de yê.

Esnafî serê sibayî dikananê xo kenê a la verî ke sîftah bikerê şanan dikananê xo qefilnenê. Polîtîkaya ekonomî ya AKP-MHPyî Colemêrgî rê zî zaf tesîr kena.

Esnafanê ke ajansê ma rê qisey kerd, pare kerd ke ê hînî nêeşkenê debarê xo bikerê û semedo ke kurê dolarî zêdîyeno bi heman hawayî vaya her çîyî zêdîyena. 

Hemwelatîyêko ke 20 serrî yo Colemêrgî de esnafîye keno da zanayene ke sektorê esnafîye hînî nêmend, esnafî tim zerar kenê û nêeşkenê kîraya xo zî bidê. 

Esnafêkê bînî zî ard ziwan ke rewşa înan zaf xiran a û eke wina dewam bikero Tirkîya krîzê ekonomîkî ra birija. Esnafî vat ke rewşa înan xemê AKP-MHPyî de nîya ke qes û qonakan de ciwîyenê. Esnafî vat: ''Na rewşe heta keyî wina dewam kena ma nêzanenê la eke wina şora Tirkîya zî rijîyena şar zî vêşan maneno.''