Deklarasyonê Yewîye: Kurdî bi yewbîyayîşî eşkenê ser bikewê

Amed de kombîyayîşê yewîya neteweyîye ra dima deklarasyonêk ame weşanayene. Deklarasyon de bale ameye antene muhîmîya yewîya kurdan ser û ame vatene ke partîyê kurdan do menga çeleyî de komxebatêk bikerê.

Temsîlkaranê Kongreya Komele Demokratîkî (KCD), Partîya Demokratîke ya Şaran (HDP), Partîya Herêman ê Demokratîkan (DBP), Komeleya Kurdan ê Demokratan ê Şorişgêran (DDKD), Partîya Demokrate ya Kurdîstanî-Tirkîya (PDK-T), Platformanê Demokratan ê Kurdan ê Vakurî (PDK-Vakur), Partîya Merdiman û Azadîye (PÎA), Têgêrayîşê Azadî, Partîya Komunîstanê Kurdîstanî (KKP) deklerasyonê kombîyayîşê yewîya neteweyîye eşkera kerd.

Kombîyayîş otêleka Yenîşehîrî de ame kerdene û Hemserekê KCDyî Berdan Ozturk, Hemserekê DBPyî Keskîn Bayindir, wekîlê HDPyî Tayyîp Temel û Nusrettîn Maçîn û temsîlkarê partîyan tewrê kombîyayîşî bîyî. Tirkîya deklerasyonî hetê Hemsereka DBPyî Salîha Aydenîz ra kurdkîya ci zî hetê Serekê Pêroyî yê PÎA Mehmet Kamaçî ra ame wendene.

Deklarasyon

"Ma venga şarê kurdî danê ke vera zulmî û teda wa hêzê xo biko yew!

îqtîdarê AKP-MHPyî bi hawayêkê bêhuqûqî hemşaredarê ma yê ke hetê şarî ra ameyî weçînayene wezîfe ra gêno û herinda înan de qeyûman tayîn keno. Bi nê hawayî îradeyê şarê ma û demokrasî binpay keno. Operasyonê sîyasî yê vera sîyasetmedaranê kurdan zî bi nîzamî dewam kenê. Îqtîdar keno ke heqê sîyasetkerdişî yê şarê ma çin biko. Na rewşe ya ke zere û teberê welatî de vera kurdan dewam kena, sere de yewîya neteweyîye xîretê neweyî pêşkêşê ma kena. Serebûtê ke çar parçeyanê Kurdîstanî de qewimîyenê bala rayaumûmîya dinya ancenê rewşa kurdan ser. Eke ma hêzê xo bikê yew hêzê mîyanneteweyî do hîna zêde paştî bidê têkoşînê xo yê demokratîkî, haştîyanê û sîyasîyî. Waştişê şarê ma vera zulmî, teda, feqirîye yewbîyayîş o. Bi nê armancî 5ê teşrîna peyêna 2019î de nê partî û têgêrayîşanê ke cêr de îmzaya înan esta kombîyayîşêkê bi rojdemê yewîya neteweyî serûber kerd.

Qerarî

"Kombîyayîşî de nê qerarî ameyî girewtene:

I- Vakurê Kurdîstanî de Îtîfaqê Neteweyî do bêra awankerdene

II-  Derheqê esasê Yewîya Neteweyîye de xebatî do bi nameyê ''Xebata Yewîya Kurdîstanî'' bêrê kerdene

III- 18-19ê çeleyê 2020î de derheqê metodan, çerçewa, caardişî, kerdişê Yewîya Neteweyîye de komxebatêk do bêra kerdene.

IV- Amadekarîya komxebate hetê komîsyonê panc kesan ra do bêra serûberkerdene

V- Xebata Yewîya Neteweyîye seba tewrbîyayîşê pêro hetan û partîyanê kurdîstanijan do amade biba

Vengdayîş

"Ma venga şarê xo danê ke nê prosesê tarîxî yê yewîya neteweyîye de rexne, fikr û paştdayîşanê xo pêşkêşê ma biko. Ma do pîya nê proses bîyarê ca û hedefê xo yê Yewîya Neteweyî pîya pîl bikê."

Îmzakarê Deklarasyonî

"Têgêrayîşê Azadîye

Partîya Azadîye

Partîya Herêman ê Demokratîkan (DBP)

Kongreya Komele Demokratîkî (KCD)

Partîya Şaran ê Demokratîke (HDP)

Partîya Merdimî û Azadîye (PÎA)

Partîya Komunuste ya Kurdîstanî (KKP)

Platformê Demokratanê Kurdan ê Vakurî (PDK-Vakur)

Partîya Demokrate ya Kurdîstanî ya Tirkîya (PDK-T)"