Dêrsim: Ma derbeya vera îradeyê şaran qebûl nêkenê

Hêzê Kede û Demokrasîyî yê Dêrsimî bi eşkerayîyêk vera xespkerdişê şaredarîyanê Bajaranê Pîlan ê Amed, Wan û Mêrdînî razînêbîyayîş ramot û vat ma derbeya vera îradeyê şaran qebûl nêkenê.

Hêzê Kede û Demokrasîyî yê  Dêrsimî ke Meydanê Seyîd Rizayî de ameyî têhet, hêrişê îqtîdarî yê vera îradeyê şaran şermezar kerdî. Eşkerayîye  de ame vatene ke îqtîdarê AKP-MHP’yî çîyo ke sandiq de vînî kerd bi şuxulnayîşê hêzê dewlete bizor xesp keno.

Eşkerayîya ke hetê serekê Komeleya Heqanê Merdiman ê Şûbeyê Dêrsimî Gurbuz Solmazî ra ameye wendene de ca dîya nînan: ‘’ Sey Serra 2016’î reyna îradeyê şarî bi qeyûman ame xespkerdene.Ma nê qewimîyayîşan şermezar kenê. Îradeyê şarî nêno xespkerdene. Sere de Dêrsim de herême de kesê ke ameyî destbendkerdene û tepiştene ganî ca de bêrê veradayene.’’

Hemserekê HDP’yî yê Bajarî Hidir Çîçekî vist vîrî ke  400 ra zafêr kesî ameyî destbendkerdene û va: ‘’ 7 kesî zî Dêrsim de ameyî girewtene. Ganî heme embazê ma ca de bêrê veradayene. Îqtîdarê AKP-MHP’yî çîyo ke sandiq de vînî kerd bi şuxulnayîşê hêzê dewlete bizor xesp keno. Bi nê caardişan qet meşrûyetê  îqtîdarî nêmendo. Ganî heme kesê ke wayîrê wijdanîye vera na neheqîye bivejîyê.’’ Çalakîya ke  bi pankarta ‘Ma derbeya vera îradeyê şaran qebûl nêkenê’ ameye viraştene bi slogan û çepikan qedîyaye.