Destbendkerdişanê Wanî de qemtê cinîyan ameyî girewtene

Wan de kesê ke protestoyanê vera qeyûman de ameyî destbendkerdene înan ra 40 kesî hema nezaret de yê. Goreyê zanayîşan kesê ke nezaret de yê înan ra yeno waştene ke wa ewraqê ‘bi talîmatî protesto ame kerdene’ îmza bikerê û qemtê cinîyan ameyî girewtene.

Wan de kesê ke protestoyanê vera xespkerdişê şaredarîyanê Amed, Wan û Mêrdînî yê HDP’yî de ameyî destbendkerdene înan ra 40 kesî hema nezaret de yê. Goreyê avûkatan muameleyê îfadeyî roja Sêşemeyî rê mendî.

Ame zanayene ke cinîyê ke Wan de  ameyî destbendkerdene qemtê înan ameyî girewtene. Firat Koço ke îşkence dîyo, rixmê raporî nêame veradayene. Reyna goreyê avûkatan destbendkerdeyan ra xeylî kesanê bînan zî sey Firat Koçî raştê îşkenceyî ameyî û ameyî derbkerdene. Goreyê zanayîşan  kesê ke nezaret de yê înan ra yeno waştene ke wa ewraqê ‘bi talîmatî protesto ame kerdene’ îmza bikerê. Hetê bînî ra kesê ke 5 rojî yo nezaret de yê hema îfadeyê înan  nêameyo girewtene û îfade roja Sêşemeyî rê mend.