Dr. Sîpan: Sebebê janî modernîteya kapîtalîst  a

Dr. Erdal Sîpanî bale ante janê vîrusê Korona ser ke dinya de vila bi û pare kerd ke sebebê janî modernîteya kapîtalîst a. Dr. Sîpanî vist vîrî ke welatê kapîtalîstî nêeşkenê heqê janî ra bêrê.

Doktor Erdal Sîpanî derheqê vîrusê Korona, tedbîranê şarî û pêlê diyînî de ANFyî reyde qisey kerd.

Doktor Sîpanî ard ziwan ke dewletê kapîtalîstî vera vîrusî bêçare mendî û vat: ''Dinya de 6 mengan ra nata rewşa îstîsnayîye esta, tay welatan de nîsbetê nêweşanê janî kêmîya  la hema zî jan rojdemp tewr girîng o.  Derheqê vîrusî de hema zî xeylêk zanayîşî çin ê. Welatê kapîtalîstî yê ke her roje wasfê xo dayêne, vera nê vîrusî bêçare mendî. No vîrus reyna mojna ke weşîya komelî û xoza her çî ra verî yenê. Welatê kapîtalîstî xoza texrîb kenê. Mumkîn nîyo ke hîşmendîya weşîye ya zaniste laboratuwar de mehsur bimana û xebera zanistî seba pîlkerdişê sermaye derheqê janî de bivejîya. Sebebo verên ê janî kapîtalîzm o.

Tirkîya de îktîdar derheqê janî de zanayîşê zelalî pare nêkerdî, hûmara nêweşan zî pare nêkerd. Ma zanenê ke despêk de îqtîdarî şarî rê çîyêk nimit. Tirkîya sey welatanê bînan nêeşkena tedbîranê hewceyan bigêra. Ganî komel pabeyê dezgehan nêmano û tedbîranê xo bigêro. Eke cayêk de nêweşîye kêmîyaye zî nişka ra beno ke bizêdîye. Coka ganî şarê ma tedbîranê xo bigêrê. Ganî bi hawayêkê cidîyî nêzdîyê janî bibê. Na nêweşîyêka giran û cîya ya. 

Tabloyo ke derheqê doneyanê vîrusê Korona de yeno parekerdene raşt nîyo. Eke testî kêm bibê kesê pozîtîfî zî kêm benê. Îqtîdar hûmara raştikêne şarî ra nimiteno.O wazeno ke ekonomîya xo raşt bikero û krîzî ra bivejîyo.Hukmat şar sey esas nêgêno. Hukmat ganî çarçwewa Covid-19î de polîtîkayan biaferno. Ganî weşîya komelî û xoza sey esas bigêro.''