Ebdulxenî Oso: Îşxalkerî do ser mekewê

Hemserekê Kantonê Heseke Osoyî vat: “Îşxalê Dewleta Tirkan verî sernêkewt do ewro zî ser mekewo” û ard ziwan ke hewcedarîya merdimanê ke îşxalî ra serkewte koçber bîyê  bi hetkarîya mîyanneteweyî esta.  

Hevserekê Kantonê Heseke Ebdulxenî Osoyî dîyar kerd ke nêzdîyê 300 hezar sîvîlan îşxalê Dewleta Tirkan û ê cerganê aye ra serkewte neçare mende ke keyeyanê xo caverdê û nika dibistananê şaristananê der-dorî de manenê û nîşan kerd ke her şert û mercî de do vera îşxalî xo ver bidê û bi ser bikewê.

Ebulxenî Osoyî ard vîrî ke Dewleta Tirkan seba ke bi destê cerganê DAÎŞ û EL Nusra ser nêkewete artêşa xo fîşte dewre û vat: “Dewleta Tirkan nêeşkena nê metodê galî bi hovîye dewam bika. Şarê herême êdî sey verî nîyê. Nika mîyanê komelî de yewîye esta. Kurd, ereb, suryan û şarê bînî yê herême pêro pîya cuya xo dewam kenê. Do vera her hêzî yo ke verê îradeyê înan de vindeno xo ver bidê.”

'Kesî hetkarî nêkerde '

Osoyî ard ziwan ke sewîya verêne ya planê îşxalkerdişî yê Dewleta Tirkan awankerdişê herêma îşxalkerdeya ke Serêkanî û Girê Sipîyî ra ver bi xorînîya Rojawanî 32 kîlometreyî şona û ard vîrî ke  bi se hezaran merdimî îşxalî ver neçare bîyê koçber û mîyanê şertanê giranan de cuwîyenê. Osoyî vat: “heseke de 63 dibistanan de koçberî manenê. Ma merdimanê koçberan ra wayîr vejînê. Seba koçberan ma herême de di kampî viraştî. Nêzdîyê 3 hezar konî do bêrê wefîştene. Reyberîya Xosere koçberan rê bi her hawayî bena  hetkar. Rayberîya Xosere ra teber kes hetkarîya koçberan nêkeno.”

'Demografî êno vurenayene’

Osoyî nîşan kerd ke şarê Vakur û Rojhelate Sûrîye  seba ke peynîya îşxalî bîyaro tim xo ver dano. Şarê herême pîya vera îşxalî vindenê û vat: “Vanê ke seba sîvîlanê ke neçare mende Sûrîye ra koç kerdo galê herême kenê. Gelo nê merdimê Serêkanîye û Girê Sipî kam ê? Ê şarê na herême yê. Kesê ke Dewleta Tirkan wazena ke herême de ca bikera ê cergê ke tewr eleqeya xo bi herême çin o. Bi koçberkerdişê şarê herême Dewleta Tirkan wazena ke demografî bivurena. Şarê herême na rewşe qebul nêkeno û heta peynî do xo ver bido. Mumkun nîyo ke  cergê ke teber a ameyê herême de bimanê.”

'Dewleta Tirkan do ser mekewa’

Osoyî dîyar kerd ke çîyo ke Dewleta Tirkan Efrîn de kerdo wazena ke Serêkanîye  û Girê Sipîy de zî bikera û vat: “Şar na yewe qebul nêkeno û xo ver dano. Seba ke demografîye herême bivurenê şarî koçber kenê. Dewleta Tirkan verî ra wazena ke herême îşxal bika. Senî ke verî zî ser nêkewte do nika zî ser mekewa. Şar do xo ver bido û ser bikewo.”

Seba tedarîkkerdişê stargeh, werd û  şimitişî Osoyî venga sazîyanê mîyanneteweyî da û vat: “Seba ke koçberî dibistanan de manenê perwerdeyê herême vineto. Hêz û rayaûmumîya pêroyî yê mîyanneteweyî seba paydakerdişê îhtîyacanê şarê herême ganî çareyêk peyda bikerê.”