Emnîyetê canî yê hepsîyan çin o

Îdarekara TUAY-DERî awukate Aslihane Bulut derbarê hepsîyan rê îşkenceyî de vat: “Hepsî dîyar kenê ke emnîyatê canê înan çin o.

Dewleta Tirkan hepisxaneyanê Tirkîya û Kurdîstanî de îşkenceyê xo zêdeyêr kena. Bi taybetî hepisxaneyanê tîpê D û Tyî yê Amedî û hepisxaneyê cinîyan û ê numreyê 2. ê Xarpêtî de îşkenceyî bîyê zêdeyêr. Komela TUAY-DERî çend rojî verî dîyar kerdîbî ke awukatê înan şîyê nê hepisxaneyan û raporêk weşanabi. Îdarekara TUAY-DERî awukate Aslihane Bulute ANFyî rê behsê nê raporî kerd. 

Awukate Aslihane Bulute dîyar kerd ke Amed û Xarpêtî de cezayê dîsîplînî bîyê zêde û bi nê cezayan wazenê ke hepsîyî mêrê veradayene. Awukate Aslihane Bulute dîyar kerd ke hepisxaneyê cinîyan ê Xarpêtî de seba ke yew hepsîye tîşortê girane V dayo xora mudurê hepisxaneyî bi bahaneyê “gore ehleqî kincan nêdana xora” cezaya dîsîplînî daya ci. Bulute vat ke “nê cezayanê dîsîplînî ra serkewte hepsîyî nênê veradayene. Keso ke ganî aşma êlule de hepisxaneyî ra vejîyo do encax aşma adare de vejîyo.”

Hepisxaneyê Xarpêtî de galê fizîkî

Bulute dîyar kerd ke Hepisxaneyê Xarpêtî de îşkenceyê fizîkî zî rojeve de yê û vat: “No îşkence rewna yo esto, ma gilîyê sucî kenê la tewr netîceyek nêfînenê xo dest. Hepsî demo ke derb benê destûre nêdayîna înan ke şorê doktor û rapore bigêrê. Seba ke raporê derbkerdişî çin ê birra teqîb nêkerdîşî yê gilîyê sucî dayîna. Îşkenceyê fîzîkî ra sewbîn îşkenceyê psîkolojîk zî yeno kerdene.”

Odayan de kapasîta ra cor hepsî estê

Awukate Bulute derheqê Hepisxaneyê Mêrdînî zî agahî daye û vat: “Nê hepisxaneyî de kapasîta ra cor hepsîy estê. Mîyanê nînan de nêweşê giranî zî estê û taye kesî erd de rakewenê. Hepsîyêk seba ke kewto grevê veyşanîye çime xo ra bîyo la hîna teşhîsê ey zî nîyamo kerdene. Teberê nînan de problemê awe zî esto. Serê her hepsîyî rojêke de 50 lître awe danê. 50 lîtreyan ra dima awe birnenê.”

Hepsî: Beno ke ma bikişê!

Awukate Bulute dîyar kerd ke hepisxaneyê numra 2. ê Xarpêtî de galê 15-20 hepsîyan kerdo û vat: “Ma dî ke hepsîyêk nêeşkeno qisey biko û bi hawayêko giran ameyo derbkerdene. Aşmêke ra dima ke ma şîme eynî hepisxaneyî hepsîyan dîyar kerd ke emnîyetê înan ê canî çin o û înan ma ra vat ‘beno ke tîya ma bikişê.’ Ma nê gilîyan bi rayîrê çapemenîye danê eşnawitene la dima birra teqîbnêkerdişî yena dayene.”

Zerê werdî ra pîsîye vejîna

Awukate Bulute behsê problemanê Hepisxaneyê Amedî zî kerd û vat: “Hepsîyan dîyar kerd ke zerê werdê înan ra muy, pîsîya merreyan û camî vejîyenê. Nê camê zerê werdî ra serkewte ziwanê hepsîyêk birîyayo. Ma seba na yewe muracat kerd la tewr netîceyêk nêgirewt. Nê werdan ra serkewte hepsîyî kewtîbî grevê veyşanîye. Werdî kêm dayînê hepsîyan, nêeşkenê xo tam mird bikerê.”