Belgefîlmê ‘‘Fermandare Arîane‘‘ ke dîrektorîya ci Alba Sotorra kerda şewa Çarşame Parlamentoya Ewropa de ame ramotene. Arîane ke  karekterê esasî yê filmî ya bi skypeyî tewrê aktîvîteye bîye û morê xo piroda .

Dîrektora fîlmî Sotorra, pîyê Anna Campbelle ya ke Efrîn de cuya xo vîndî kerdebî Dîrk Cambelle, dîrektor Stelios Kouloglou û Têgêrayîşê Cinîyan ê Kurdan ra aktîvîste Dîlar Dîrîke tewrê aktîvîteye bîyî.

DEWLATA TIRKÎ WAZENA HÊZ BIDO DAÎŞÎ

Fermandara YPJyî Arîane bi skypeyî tewrê aktîvîteye bîye û qiseykerdişê xo de waşt ke sere de Tirkîya wa vernîya paştgêranê DAÎŞÎ bêro girewtene.

Arîane vist vîrî ke 6 serrî yo ê hemverê DAÎŞî de şer kenê û va: ‘‘Ma vera DAÎŞî kewtî ser la dewleta tirkî paşt dana çeteyan û wazena ke reyna hêz  bido ci. Ma wazenê ke hêrişê vera kurdan bêrî vindarnayene. Ganî sere de dewleta tirkî ê ke paşt danê DAÎŞî bêrî vindarnayene. Dewleta tirkî wazena ke ma çîn bikero la ê se kenî wa bikerî ma şorişê xo pawenê. Nê şorişî de merdimîye esta, azadîye esta.‘‘

Qiseykerdişê fermandare Arîane payra ame çapikkerdene.

Fîlm de hîkayeya şexsî ya fermandara YPJî Arîane, cesaret û qerardarîyê şerwananê cinîyan, bedelê ke dayê û bedilyayîşê ke hetê înan ra ameyê viraştene yenê qalkerdene.