Gorê Şerefxanî xira kerd

Vejîya werte ke şaredarê Bedlîsî yo AKP’yijo ke tabelayê Kurdkî ardîbî war, gore nuştoxê Şerefnameyî Şerefxanê Bedlîsîyî û keyeyê ci xira kerdê.

AKP’yo ke bajaranê Kurdistanî de qirkerdişê sîyasî û kulturkîyî keno, dişmenîya xo ya hemverê Kurdan ê dimayê weçînitişê 31’ê Adare rê zî dewam kerde ke nimûneyêkê nê zî Bedlîs de vejîya werte.

Partîya Herêmanê Demokratîkan (DBP) weçînitişanê serra 2014’î de bi nisbetêkê berzî Bedlîs de bi ser kewtebî, la hukmatê AKP’yî qeyûm şaredarîye de bi ca kerd û hemverê kultur û ziwanê Kurdkî dest bi qirkerdişî kerd. Bi nê amacî mektebî, kreşî û karê kulturkîyî yê Kurdkî ameyî qedexekerdene. Verê weçînitişanê cayîyan ê 31’ê Adare û dimayê ci bi hezaran sîyasetmedar û welatperwerê Kurdî ameyî tepiştene.

Tabelaya bi Kurkî û Tirkî ya demê DBP’yî de vernîya awanîya Şaredarîya Bedlîsî de amîbî bicakerdene, bi fermanê şaredarê AKP’yijî Nesrûllah Tanglayî yo ke 31’ê Adare de amebi weçînitene amî wedartene. Herinda na tabela de tabelayêk ke tena bi Tirkî amîya nuştene amî daleqnayene. Tanglayî heman wextî de tabelaya ke dekewtişê bajarê Bedlîsî de ser o bi Îngilîzkî, Kurdkî û Tirkî “Şima bi xêr ameyî Bedlîs” nuştebi wedarte. Herinda na tabela de zî tableya ke tena bi Tirkî ya bi ca kerde. Şaredarîya Tetwanî ya AKP’yije zî tabelaya Kurdkî ya ke vernîya awanîya Şaredarîye de bîye wedartebî.

Qedexekerdişê Kurdkî û ercanê Kurdan demê îqtîdarê AKP-MHP’yî de bi sîstematîk. Nimûneyêko bîn ê nê hêrişan Bedlîs de vejîya werte. Na rey zî hêrişê gorê sîyasetmedaro Kurd o namdar û tarîxnas Şerefxan Bedlîsîyî û keyeyê ê ame kerdene.