HPGyî nasnameyê di şehîdan eşkera kerdî

HPGyî nasnameyê di gerîlayanê ke hêrişê bi bombaya nuklere şehîd bîyê eşkera kerdî û vat: ''Ma do qetî qesasê şehîdanê xo bigêrê.''

Merkezê Îrtîbatî û Çapemenîye yê HPGyî nasnameyê di gerîlayanê ke hêrişê bi bombaya nuklere şehîd bîyê eşkera kerdî. Eşkerayîye wina ya:

''Gerîlayanê azadîye vera hêrişanê îşxalî yê serê Zap, Avaşîn û Metîna pê îradeyê Apogîrî cepheyêkê xoverdayîşî awan kerd. Artêşa îşxalkere rixmê teknîk, îmkanan, leşkeranê xo yê kîrakerdeyan, cerganê xo, kontrayanê xo, hêzanê xo yê taybetan, hêzanê teberî û kurdanê xayînan zî Warê Xoverdayîşî yê Girê Hekarî de nêeşkaye xoverdayîşê gerîlayan bişikna. Gerîlayan mojna ke vera hende leşkeranê artêşa îşxalkere senî bi îrade, hişmendî û çêrî vindenê. Bêguman no xoverdayîşê xêrê kedan, bawerîya azadîye, sebt, perwerîya bi şehîdan û Rayberîye ame afernayene.

Artêşa îşxalkere wexto ke pê xoverdayîşê gerîlayanê azadîye nêeşkaye û vînîbîyayîşê pîlî dayî Warê Xoverdayîşî yê Girê Hekarî de bi hawayêkê bêperwayî bombaya nuklere ya taktîkî û çeka kîmyewîye xebitnaye. Artêşa îşxalkere rixmo ke zaf reyî no sûcê şerî kerdo û belgeyê nê sûcî rayaumûmîya dinya de ameya parekerdene qet yew nêrazîbîyayîş nêdî û şuxilnayîşê çeka kîmyewîye kerd sîstematîk.

Fermandarê ma yo neteweyî Nûrî Yekta û ewlada qehremane ya şarê ma Amara Amed Girê Hekarî de bîyî serkêşê xoverdayîşî, xoverdayîşo tarîxî aver berd û hêrişê bi bombaya nuklere ya taktîkî de şehîd bîyî.

Ma sere de keyeyanê înan ê ercîyayeyan rê pêro şarê welatperwerî yê Kurdîstanî rê serweşîye wazenê. Ma do tim vîrameyîşê şehîdanê xo bidê ciwîyayene. Ma do qetî xo vîr a nêkerê ke embazê ma hetê dewleta tirke ra bi hawayêkê namerdî, pê çeka kîmyewîye ameyê qetilkerdene. Ma do qetî qesasê şehîdanê xo bigêrê, nê sûcê şerî her ca de teşhîr bikerê û rîyê qirkerî yê dewleta tirke pêro dinya rê bimojnê.

Nasnameyê şehîdanê ma wina yê:

Nameyê Qodî: Nûrî Yekta

Name û Peyname: Cevat Etarek

Cayê Bîyayîşî: Mahabad

Maye-Pî: Zeynepe – Muhammed

Tarîx û Cayê Şehadetî: 15ê Hezîrana 2022yî / Metîna

Nameyê Qodî: Amara Amed

Name û Peyname: Ayşe Toprak

Cayê Bîyayîşî: Êlih

Maye-Pî: Fatma – Mehmet

Tarîx û Cayê Şehadetî: 3yê Hezîrana 2022yî / Metîna

Embaz Nûrî şaristanê Mahabadî yê Rojhelatê Kurdîstanî de dadîya xo ra beno. Embaz Nûrî Komployê Mîyanneteweyî ra dima tewrê xebatan beno û 2001 de zî verê xo dano waranê gerîlayan. Embaz Nûrî Rojawan de xebatanê ciwanan de cagêno û 2004 de serkêşîya Serewedaritişê Qamişloyî keno. Dima o hetê namerdan ra teslîmê rejîmê Sûrîye yeno kerdene, îşkenceyanê giranan vîneno û 7,5 serran zîndan de maneno. 2011 de teslîmê Îranî yeno kerdene û 1,5 zî tîya de zîndan de maneno. Dima reyna agêreno koyan û Dibistana Merkezê Partîye ya Mazlûm Doganî de perwerde gêno. O waştişê xo ser o tewrê şerê Helebî beno, tîya de fermandarîye keno. Embaz Nûrî dima Akademîya Hakî Karerî de perwerde gêno û uca ra derbazê Metîna beno. O Hemleya Şorişgêre ya Şehîd Savaş Maraşî ya Cengê Xabûrî de fermandarîye keno. Embaz Nûrî 15ê hezîrane de netîceya hêrişê kîmyewîyî yê artêşa îşxalkere de şehîd beno.

Embaze Amara Êlih de dadîya xo ra bena. Embaze Amaraya ke tim sempatîzana partîya ma bîye Newroza 2017î de verê xo dana koyan û bena gerîla. A 2019 de perwerdeyan vînena û perwerdeyanê xo bi serkewtişî qedînena. A verî Garê de têkoşîn kena, perwerdeyan ra dima derbazê Metîna bena.. Bi taybetî Warê Xoverdayîşî yê Girê Hekarî de kedêka pîle dana. Embaza ma Amara pê kesayetê xo yê kedkar û fedakarî tim vernî de ca gêna. Embaze Amara sey gerîlayêka YJA-Starî bi xurtî têkoşîn kena û bena şehîde.''