Kedkarê çapemenîya azade: Ma do milê xo çewt nêkerê

Kedkarê çapemenîya azade ke vera tepiştişê embazanê co ameyî têhet ard ziwan ê ke do vera zextan milê xo çewt nêkerê.

Xebatkarê Ajansê Mezopotamya, Jinnews û rojnameyê Yenî Yaşamî zî tede kedkarê çapemenîya azade vera destbendkerdişê muxabîranê Ajansê Xebaran ê Etkînî (ETHA) kombîyayîşê çapemenîye kerd.

Kombîyayîşo ke Komelê Heqanê Merdiman ê Îstanbulî de ame kerdene parlamenterê HDPyî yê Îstanbulî Zuleyha Gulum û Huda Kaya, Parlamenterê CHPyî Sezgîn Tanrikulu zî semedê paştdayîşî tewrê ci bîyî.

Kombîyayîş de Emre Ormanî bi nameyê embazanê eşkerayîye wende. Eşkerayîye de bale ameye antene zext û hêrişê vera rojnamegeran ser û ame vatene ke hêrişo vizêrîn ê ver a ETHA ne verên bi ne zî do peyêne bo. Eşkerayîye de ame vatene ke seba ke vera îqtîdarî ê cayê şarî de ca genê û raştîyan anê ziwan hedefê hêrişan de yê la rojnamegerê ke wayîrê tarîxê binanorî yê do milê xo çewt nêkerê.

Edîtoranê ETHA ra Nadîye Gubuz vat polîsî sey dizdan kewtî buroyê înan û dest na xeylêk materyalanê înan ser.

Nacî Kayayî ke bi nameyê Ajansê Mezopotamya qisey kerd ard ziwan ke notê rojnamegeran sey delîlî yenê ramojnayenê ne ke no tepiştişê azadîye îfadeyo yo.

Zuleyha Gulum zî vat seba ke çapemenîya azade vengê heqîqet, demokrasî û adeletî dana eşnawitene hedefê hêrişan de ya.