'Kobanê nêginaye war, HDP zî do megino war'

HDPyî herişê vera ci sey 'hêrişê qesasî' name kerd û vat: 'HDPyî verê darbeyanê şima de çirey çok nêda do medo. Reyna xeylêk hetan ra vera hêrişî nêrazîbîyayîşî ameyî.''

Serdozgerîya Komare ya Anqara derheqê çalakîyanê Kobanê yê 5-9ê teşrîna verên a 2014 î de 7 bajaran de derheqê 82 kesan de qerarê destbendkerdişî da. Çarçewa operasyonê qirkerdişê sîyasîyî de hemşaredar û wekîlê verênî yê HDPyî zî tede xeylêk kesî ameyî destbendkerdene.

HDPyî hesabê xo yê Twîtterî se ra bi etîketê “#HDPsusturulamaz”  (HDP nîno hîşkerdene) vera destbendkerdişan hêrsê xo ard ziwan. HDPyî vat: ''Ewro serê sibayî vera partîya ma hêrişê qesasî ame kerdene.  Vizêr Kombîyayîşê MGKyî de, merasîmê veyveyî yê Qesrî ke dozger tewrê ci bi de ame girewtene. Blogê AKP-MHPyî çend vînî keno hende wazeno muxalefetî tasfîye bikero. HDPyî verê darbeynê şima de çok nêda do medo.''

Wekîla HDPyî ya Êlihî û Vervatoxa Meclîsê Cinîyan ê HDPyî Ayşe Acar Başaran  zî parekerdişê xo yê medyaya sosyale de vat: ''Kobanê nêginaye war, HDP zî nêgineno war. Şima do ser mekewê.''

Reyna xeylêk roşnvî, nuştox, pawitoxê heqan û sîyasetmedaran se medyaya sosyale ser o nêrazîbîyayîşê xo ramojna.  Mesajan de hêrişê hukmatî ame şermezarkerdene paştî dîyaye HDP.