‘Ma hêzê xo xoverdayîşê xo ra bigêrê’

Vervatoxa Kongreya Star a Şêx Meqsûdî Hesane vat ganî cinîyî zihnîyetê serdestî yê camêrdî û dewletan ra umîdê çîyêk nêkerê û vat, “Ma xo û xoverdayîşê xo ra hêz bigêrê û cinî bikerê xurte.”

Eşrefîye û Şêx Meqsûd mehlayê Helebî yê ke seba rastîya şarî ya şorişgêre sey nimûne yenê ramotene. Şarî nê mehlayan de fek ca û wareyê xo ra vera nêda, xover da û netîce de bi ser kewt.

Vervatoxa Kongreya Starî ya Heleb-Şêx Meqsûdî Fatma Hesane ya ke hewteyê ravêrteyî de tewrê kongreya awankerdişê Meclîsê Cinîyan ê Vakur û Rojakewtena Sûrîye bîye, persanê ANF’yî rê cewabî dayî.

Hesane qiseykerdişê xo de nê vatî:

„Ma umîd kenê ke Meclîso ke ameyo awankerdene do têgêrayîşê cinîyan Sûrîye, Rojakewtena Mîyanêne û dinya de vila bikero, vate, umîd û projeyê Rayber Apoyî bi ca bîyaro. Ma bêmabên xover bidê, hêzê dewlete û zihnîyetê serdest ê camêrdî ra çîyêk nêpawê. Ma xo û xoverdayîşê xo ra hêz bigêrê. Ma pîya eşkenê cewabêkê rastî bidê nê prosesî.

Xoverdayîşê Şêx Meqsûdî nizdê 5 serran dewam kerd. Bi hêzo ke cinîyan, camêrdan, domanan, kokiman yanî her kesan Rayber Apoyî ra girewto xoverdayîş ame kerdene û nêame verdayene ke çeteyî dekewê mehlaya Şêx Meqsûdî. Rayber Apo zî xeylî reyan ame bajarê Helebî, perwerde da, mi bi xo zî Rayber Apo dî, hêzêko pîl ê ra girewt. Ma bi nê hêzî Şêx Meqsûd azad kerd.

Şêx Meqsûd cayêko stratejîk o. Eke ma Şêx Meqsûdî ra fek vera bidayêne do Heleb bi temamî dest ra bişîyêne. Şarê ma Şêx Meqsûd de karê rindî kerdî. Mesela rojnameyê Ronahî ame vetene û kovara ma zî.

Netîce de ez vana ke ma bi mengan, serran xover da û ma bi ser kewtî. Serkewtişê ma her kesî rê bi nimûne. Rayber Apoyî bi xo zî qalê nê xoverdayîşî kerdo û sey şarêko şorişgêr bi name kerdo. Şêx Meqsûd de şar û hêzê ma yê leşkerîyî bîyî yew û ma bi ser kewtî. Ma hetêk ra şer kerd, hetêna ra zî perwerde dî. Ma bi zor û zehmetîyan sey keyeyêk pîya xover da, her kesî karê xo kerd û no keye bi rastî zî netîce de bi ser kewt.“