Mêrdîn de şar wayîrê grevê vêşanîye yê tepişteyan vejîya

Mêrdîn de şarî grevê vêşanîye yê tepişteyan ê vera tecrîdê Rayberê Şarê Kurdî Abdullah Ocalanî rê selam kerd. Wekîle Dundare û Hemserekê HDPyî yê Mêrdînî Salîh Kudayî îfade kerd ke waştişê tepişteyan waştişê kurdan ê.

Rêxistina HDPyî ya Mêrdînî grevê vêşanîye yê tepişteyan ê vera tecrîdê Rayberê Şarê Kurdî Abdullah Ocalanî rê bi çalakîyêke selam kerd.

Wekîla HDPyî ya Mêrdînî Pero Dundare, Meclîsê Mayanê Haştîye, îdarekarê HDPyî û xeylêk kesî tewrê çalakîye bîyî. Çalakîye de pankarta bi nuşteyê 'Ma do tecrîd bişiknê faşîzm birijnê' ameye akerdene û sloganê 'Biciwîyo xoverdayîşê zîndanan' ame vatene.

Hemserekê HDPyî yê Mêrdînî Salîh Kudayî da zanayene ke 62 rojî yo grevê vêşanîye dewam keno û her roje heqê tepişteyan yenê binpaykerdene. Kudayî venga hukmatî da ke waştişanê tepişteyan wa bîyaro ca.

Wekîle Dundare zî çalakîye de qisey kerd û vat: ''Îqtîdar û Wezaretê Edaletî vera grevê vêşanîye bêveng ê. Înan  masaya haştîye xirapnaye. No îqtîdar wazenoher çi pê şerî bikero. Na bêvengîye grevê vêşanîye kena granêr. Ma do hertim vengê tepişteyan rê bibê veng. Waştişê înan waştişê ma yê. Wa îqtîdar nê waştişan bîyaro ca.''