PAJK: Ganî no xoverdayîşo tarîxî bêro girdkerdene

Komîteya Zîndanan a PAJKî bi eşkerayîyêk waşt ke semedê pawitişê rûmetê merdimîye, hemverê faşîzmî de wa xoverdayîş bêro girdkerdene.

Komîteya Zîndanan a PAJKî derheqê grevanê vêşanîye yê ke hemverê tecrîdê serê Rayberê Şarê Kurdî Abdullah Ocalanî de yenî viraştene de eşkerayîyêka nuştekîye daye.

Eşkerayîye ra tayî cayê wina yê:

‘‘40 serrî yo ma vera faşîzmî mucadeleyê estbîyayîşî danê û mucadeleyê ma rixmê heme hêrişan çend şino gird beno. Hêzê tarî yê ke bi polîtîkaya lete bikerê, pêverdê û îdare bikerê esas genî, Rojakewtena mîyanêne de bi  paştîdayîşê çeteyan û weyekerdişê rêxistinanê terorî şer xorî kenî.

HÊRIŞÎ DEWAMÊ KOMPLAYA MÎYANNETEWEYÎYE YÎ

Projeyê Kurdistano azad, Rojakewtena mîyanêna demokratîke yê Rayberîya ma yo ke yew cade ciwîyayîşê şaran esas gêno biyo umîdê şaran. No zî hêzanê modernîteyê kapitalîstî tersneno. Coka mîmarê na felsefeye Rayber Apoyî ser tecrîd ameyo xorîkerdene. Reyna hêrişê dewleta tirkî yê vera Efrîn, Rojawan, Mexmûr û Şengalî, qerarê Amerîka yê vera hîrê serkêşanê PKKyî, operasyonê qirkerdişê sîyasîyî yê vera sîyasetmedaranê kurdan, hêrişê vera têgêrayîş û şarê ma ramojneno ke komplo dewam kena.

Bi hezaran tepişteyê PKK û PAJKî  yê ke xoverdayîşê 14ê Temmuze xo rê sey mîrasî girewto, ewro zîndanan de xoverdayîşî rê dewam kenî. Tepişteyê ke Rayber Apoyî sey xeta xo ya sûre vînenî ewro ci rê giredayîşê xo bi bedenê xo mergî rê rakerdişî ramojnenî. Grevê vêşanîye yê bêdem-biagêrayîşî ke 27ê Teşrîna peyêne de ame destpêkerdene hetê 30 xoverdayoxanê zîndanan ra açarya grevê vêşanîye yê bêdem-bêagêrayîşî.

ÇALAKÎYA GUVENE ÇALAKÎYA TARÎXÎ YA

 Çalakîya Leyla Guvene ya ke rêça Sara, Xeyrî, Kemal û Mazlûman de xover dana, çalakîya şikitişê tecrîdî û rijnayîşê faşîzmî ya. Na çalakî çalakîyêka tarîxî ya. Coka ganî na çalakîye rê wayîr bivejîyo û xoverdayîş bêro xurtkerdene. Ma bi na wesîleye xoverdayoxanê zîndanan silam kenî û heme hetanê demokratîkî ra wazenê ke wa vera faşîzmî vengê xo berzê bikerî û tewrê nê xoverdayîşê tarîxî bibî.‘‘