Polîsê tirkan Amed de hêrişê HDPyîjan kerd

Polîsan hêrişê Rêxistina HDPyî ya Amedî kerd ke vera ke AKP-MHPyî wekîlîyê 3 wekîlan pê darbe batal kerdî protesto bikerê amebî pêser.

Rêxistina HDPyî ya Amedî seba ke destsernayîşê wekîlîyanê  Wekîla HDPyî ya Colemêrgî Leyla Guven, Wekîlê HDPyî yê Amedî Musa Farisogullari û Wekîlê CHPyî yê Îstanbulî Enîs Berberoglu protesto bikerê verê bînaya partîye de eşkerayîyêke kerde.

Eşkerayîye hetê Hemsereka HDPyî ya Amedî Hulya Uyanik ra ameye wendene. Uyanike ard ziwan ke 26 serrî yo ke no zîhnîyeto darbekar serê meclîsî de sey lekeyêkê sîyayî yo û vat ê do çirey teslîmê derbakaran mebê. Uyanike vist vîrî ke 1994  de zî dest nîyabi wekîlîya wekîlanê DEPî ser û vat a roje ra nata wekîlîya 27 wekîlanê ke sîyasetê demokratîke kenê ameye wardene. Uyanika vat: ''Ma na darbeyîya faşîste û bêehlaqe ya ke vera îradeyê şarî yene kerdene do çirey qebûl nêkerê. Ma sey partîyêka tradîsyonê sîyasetê demokratîkî ra yena heta ewro vera hêrişanê sîstematîkanê ke bêmabên yenê kerdene ma îradeyê şarê xo yo meşrû temsîl kerd. Ewro ro zî ma mesajê rejîmê qesre girwet û cewabê ma zelal o ke xoverdayîşê ma do dewam bikero.''

Eşkerayîye ra dima polîsan dekewtişê bîna de hêrişê HDPyîjanê ke siloganê xoverdayîş ciwîyayîş o eştenê kerd.

Reyna Yenîşehîr, Sûr, Kayapinar û Rezan de zî tepiştişê wekîlan ame şermezarkerdene.