Şaredarîya Çewlîgî de, butçeya serra 2018î 120 mîyon ameye eşkerakerdene la butçe se ra 45, yanê 57 mîlyonî kêmî vejîyaye. Naye ser Şaredarîye xeylî ban û cayê karî vetî rotiş.

Endamê Şaredarîya Çewlîgî yê gruba DBPyî Aydin Burçunî va Çewlîg qederê xo rê ameyo terkkerdene. Burçunî no derheq de wina qisey kerd: “Bankaya Bajaran 57 mîlyon tl yo ke seba butçeya serra 2018î seba Projeya Vurîyayîşê Şaristankî ya Taxa Kulturî daybî şaredarîye betal kerd û naye ra zî butçe se ra 45 kêmî vejîyaye. La Serekê Şaredarîye bi leze Meclîs kom kerd û bi makyaj hesabê butçe nimna. Wa şarê ma baş bizano ke butçe de 57 mîlyon tl vîndbîyaye yo û no pere do reyna ma ra bêro girewtene. Çewlîg bi nê polîtîkayan, qederê xo rê ameyo terkkerdene“

NAMZETÊ AKPYÎ YÊ ŞAREDARÎYE KEWENO KOMBÎYAYÎŞANÊ FERMÎYAN

Namzetê AKPyî yê Şaredarîya Çewlîgî seke serekê Şaredarîye bo keweno kombîyayîşanê fermîyan. Qaso ke Burçun vano her kes naye zano û no derheq de qiseyê xo wina dewam kerdî: “Hîna 3 mengê serekê Şaredarîye yê nikayî estê, la namzetê AKPyî yo newe keweno kombîyayîşanê fermîyan û sey serekî hereket keno. Sereko mewcud zî seba ke newe ra nêbîyo namzet, medyaya sosyale ser o nusneno û vano ma vera vewre mucadele kenîme. Weçînîtişê naye ra verî de zî wina bîbî. No çi yo şarê Çewlîgî nînan ra anceno! Her weçînitiş de sereko verên sey problem yeno nîşandayene û yewê neweyî vejenê meydan. Şarê Çewlîgî êdî ney tîyatroyî baş şinasneno û na dolime bi kayê înan do nêxapîyo.“