Parlamenterê HDPyî Omer Ocalano ke pêvînayîşê Rayberê Şarê Kurdî Abdullah Ocalanî yê birayê ey Mehmet Ocalanî ANFyî rê ercna vat ke dewlet Ocalanî bi keyfî tecrîd kena ke wa o xeta polîtîkaya seserra 21. bewlî mekero.

Omer Ocalanî bale ante ke muracatê pêvînayîşê keyeyê Ocalanî  ke her  hewte yeno redkerdene 12ê Çile de lezûbez ameyo qebûlkerdene û vat ke no zî ramojneno ke behaneyê sey  ‘muxalefetê hewayî‘, ‘xirabîyayîşê kosterî‘ û ‘cezayê disîplînî‘ tena kilifê tecrîdî yê. Omer Ocalanî vist vîrî ke  Rayberê Şarê Kurdî 27ê Temmuze ya 2011î ra heta ni ka bi avûkatanê xo û 11 Êlule ya 2016î ra nata zî bi merdimanê xo pêvînayîş nêviraşt.

Omer Ocalanî nê vatî: ‘‘Birêz Abdullah Ocalanî ser o 20 serrî yo caardişêko taybet esto. Ocalanê Rayberê şarê Kurdî yo û tesîrê ey Tirkîya û Rojakewtena mîyanêne de gird o. Tecrîdkerdişê ey tecrîdkerdişê şarî yo. 20 serrî yo heme heqê ey yê esasî yenî binpaykerdene. Raştî naya ke Birêz Ocalan hetê dewlete ra  bi keyfî yeno tecrîdkerdene ke wa o xeta polîtîkaya seserra 21. bewlî mekero.

 TECRÎD NÊQEDÎYA ÇEND ŞINO XORÎ BENO

Omer Ocalanî wina dewam kerd: ‘‘Tecrîd çend şino hîna xorî beno. Bi pêvînayîşê peyên tecrîd nêqedîya, dewam keno. No tena hemverê grevêna vêşanîye yê ke bi rayberîya Hemserka KCDyî û parlamentera HDPyî Leyla Guvene de ameyî destpêkerdene û vila benî de hamleya dewlete bî. Waştişê grevanê vêşanîye zaf zelal ê. Nê waştişî bi pêvînayîşê nêm saete çew nêşkeno nêvînayîş ra bêro. Dewlet hamleyêk kerde la no senî ke yeno ramojnayene wedartişê tecrîdî nîyo.‘‘

REWŞA WEŞÎYA OCALANÎ HOL A

Omer Ocalanî da zanayene ke rewşa weşîya Ocalanî hol a la o derheqê pêvînayîşî de çîyêk nêzano û wina qedîna: ‘‘Dewlet bi zilm û zordarîye çîyêk dest nêfînena. Meseleyî tena bi dîyaol û qiseykerdişî yenî halkerdene. Welat de ewro heme komel gerîyayo binê tecrîdî. Çew nêeşkeno azad fikrê xo îfade bikero. Xora çapemenî binê ambargoyî de ya. Tirkî ye de ca nêdîyeno cayîyan. Vera naye ganî na bêvengîye bêro şiktene. Ewro bi grevanê vêşanîye xoverdayîşêko erjaye yeno dayene û ganî ma naye rê wayîr bivejê.  Medyaya ke ameya destfînayene seba ke xoverdayîş mero eşnawitene çiko dest ra yeno kena. Parlamentera ke bi reyanê rekoran ameya weçînitene 71 rojî yo grevê vêşanîye de ya la medya de xeber nêbena. Ez tîya ra rena veng dana ke wa paştî bideyo nê xoverdayîşî.‘‘