Xirbê Sûrî bi kamyonan yenê rotene

Sûr de raşanayîş dewam keno û xirbê ke keyeyanê tarîxîyan ê Sûrî ra manenî bi kamyonan yenê berdene û rotene.

Qezaya Sûrî ya Amedî de bîyî 4 serrî ke pêkewtişanê 2ê kanûna 2015î ra dima 6 taxan de bi qedexeyanê vejîyayîşê teberî raşanayîş ame destpêkerdene. Sûro  ke wayîrê tarîxê 8 hezar serran o zaf bînayê ci yenê raşanayene.

Zereyê Sûrî yo ke ''Warê Sîtî'' yo hetê UNESCO ra serra 2015î de sey ''Mîrasê Dinya'' amebî îlankerdene. La reyna zî 6 taxan de înşatî yenê kerdene û bînayê betonînî yenê viraştene.

Raporê Sûrî de ke hetê Yewîya Odayanê Mîmaran û Muhendîsan ê Tirkan û Heyetê Koordînasyonê Şaristanî (ÎKK) ra ame  amadekerdene ame mojnayene ke taxanê Cevatpaşa, Hasirli, Dabanoglu, Savaş, Cemal Yilmaz û Fatîh Paşa de 87ê înan bitescîlî û 247ê înan nêzdîyê bitescîlî bi temamî 4 hezar 985 bînayî ameyî raşanayene ke nê 6 taxî warê qasê 75.3 hektarî ra yeno meydan. Rapor de na rewşa sey ''qirkerdişê kulturkî'' ame namekerdene.

Taxan de 4 serran ra nata raşanayîş dewam keno û nêno destûrdayene ke wayîrê keyeyan zî şorê Sûrî. Kerrayê ke raşanayîş ra yenê peydakerdene bi kamyonan yenê berdene bi Çemê Dicle û kamyonêkê nê kerrayan bi 8 hezar tlyî yeno rotene û ge ge na vaya goreyê kerrayan zêdîyena bena 15 hezar tl. 

Mîyanê nê kerrayan de kerrayê xemilnayeyî estê ke nasnameyê Sûrî de cayêkê taybetî gênê.  Hacetê ke verê cû keyeyanê Amedî yê tradîsyonalan de ameyî xebitnayene sey kerra arêyî, kerraya logî, beranê bîranê xemilnayeyan, qewequtikan û sutun û estunî û balîşnayê estunan ê ke arkeologî texmîn kenê ke dewrê Roma ra mendî zî yenê rotene.

img

img

 

img