Xoverdayîşê xeta Hewlêr û Mexmûrî ke bi mengî xo dima verdayî

Xoverdayoxê grevê vêşanîye yê bêdem û agêrayîşî Nasir Yagiz o ke vera tecrîdkerdişê Ocalanî, 122 rojî yo û Fedîle Toke zî 62 rojî yo grevê vêşanîye de yê.

Grevê vêşanîye yê Temsîlakarîya HDP'yî ya Hewlêrî ya Başûrê Kurdistanî roja 122'ine de yo.

Hewlêr

Grevê vêşanîye yê bêdem û agêrayîşî yê Nasir Yagizî yê vera tecrîdê serê Rayberê Şarê Kurdî Abdullah Ocalanî Temsîlakarîya HDP'yî ya Hewlêrî ya Başûrê Kurdistanî de dabi destpêkerdene roja 122'ine de dewam keno. Hetê bînî ra çalakîya hemwext a bêdem û biagêrayîşî zî bi gruba 61’ine dewam kena. Reya peyêne 1'ê Çele 2019’î de roja 73’ine de Yagiz amebi berdene bi nêweşxaneyî. Kontrolkerdişê doktoran ra dima Yagizî bi qerardarîye çalakîya xo dewam kerdibi. Her ke şina rewşa Yagizî ya weşîye xirabêr bana, bitaybet persêka bêhewnî û bitaqetîye ci bîye girane.

Mexmûr

Çalakîya grevê vêşanîye yê bêdem û bêagêrayîşî yê Endama Koordînasyonê Meclîsê Îştarî Fedîle Toke roja 62’ ine de bi qerardarîye dewam kena. Kampa Şehîd Rûstem Cûdî ya Mexmûrî de grevê vêşanîye yo ke 16’ê Kanûna 2018’î seba şikitişê tecrîdê serê Rayberê Şarê Kurdî Abdullah Ocalanî amebi destpêkerdene roja 94’ine de dewam kena. Çalakîye hemwext a bêdem û biagêreyîşî zî hetê gruba 33’ine ra ameye dewt girewtene. Merasîm de Ehmed Ozerî qisey kerd û ard ziwan ke ê do çalakîye heta tecrîdê serê Ocalanî bêro wedaritene dewam bikerê û vat, “Bi çalakîye xo ma do hêrişanê faşîstan bişiknê.”

Silêmanî

Grevê vêşanîye yê Komela Karkeranê Mezopotamya ya Silêmanî yê vera tecrîdê serê Rayberê Şarê Kurdî Abdullah Ocalanî roja 99’ine de hetê gruba 50’ine ra yeno dewam kerdene.  Seba wedaritişê tecrîdkerişê Rayberê Şarê Kurdî Abdullah Ocalanî û azadîye ey, Endama Meclîsê Herêma Germîyanî ya Têgêrayîşê Azadîye Gulebax Celale dest bi grevê vêşanîye yê bêdem û bêagêreyîşî kerd. Grevê Celale roja 5’ine de yo. Hetê bînî ra Fatma Ehmed a dewa Tatan a qezaya Pênciwênî ra nêzdîyê hewtêk o dest çalakîye kerdo, cinîyanê ciwanan reyde çalakîya xo dewam kena. Çalakîya grevê vêşanîye yê bêdem û bêagêreyîşî yê Herêm Mehmudî roja 28’ine de dewam kena. Hetê bînî ra çalakîya Şeyma Ednan a seba mengêk dest bi grevê vêşanîye kerdibi roja 20’ine de ya.