Endamê Komîteya Rayberdişî yê PKKyî Cemal Şerîkî cewab da persanê ANFyî û rojdem ercna.

Qiseykerdişê Şerîkî ra beşêk wina yo:

''Îqtîdarê AKP-MHPyî mîrasê dewleta tirke ser o bi hawayêkê hîrayî  şero taybet ano ca. Xora tim mekanîzmaya darbe ya dewlete aktîf a. Komara Tirkîya bi xo mîrasê şerê taybetî ser o ronîyaya. Şero taybet ê dewleta tirke 3 lingan ra yeno meydan: şero bêusûl (gayr-î nîzamî), darbe (tira têgêrayîşê îstîkararî vajîyeno) û şero psîkolojîk.

Şero bêusûl û şero psîkolojîk pîya yenê kerdene. Armancê şerê bêusûlî şiknayîşê îradeyê komelî, teslîmgirewtişê hişê komelî yê û o şer armanc keno ke bingeyê darbe virazo. Armancê darbe zî no yo ke şerê bêusûlî bikero şerê kontragerîla û komel newe ra awan bikero. Nînan ra şero psîkolojîk tim aktîf o.

Nika zî nê her 3 şerî pîya yenê îdarekerdene û pêro zî şerê psîkolojî ser o xo resnenê pê.

Şero taybet vera gerîlayan şerê bi artêşe red keno. Xora tede artêşe zî şuxilîyena la nê şerî de kontragerîlayî ca gênê. No şerêko winasên o ke têna pê îmhaya gerîlayan sînordar o, ê reyde vera komelî zî şero bêusîl yeno kerdene. Pê îşkence, remnayîş, sabotaj, tecawuz, vêşnayîş, talan no şer yeno caardene. Şero taybet wina beno şero gemarin.

Şerê psîkolojî de pêro metodî şuxilîyenê. Wa şerê psîkolojîkî ra têna propagandaya çapemenîye nêra famkerdene. Mîyanê şerê psîkolojîkî de teslîmgirewtiş, çinkerdişê îrade û hişmendîye estê.

Qirkerdişo kulturel zî asîmîlasyonî ra tay cîya yo.  Asîmîlasyon nêeşkeno erjanê komelî bi temamî çin bikero la qirkerdişo kulturel armanc keno ke pêro erjan û komelbîyayîş çin bikero. No têna Kurdîstan de nê pêro cografyaya Anatolia de yeno kerdene.

Darbeya 12ê Êlule ra dima amebi waştene ke komel newe ra bêro awankerdene. Îqtîdarê AKP-MHP-Ergenekonî zî nika naye wazeno û şerê psîkolojîkî îdare keno. 40 serrî yo dînperwerî û neteperwerîye ra ber qet yew îdeolojî pêşkêşê şarî nêameye kerdene. Xora nê zî ewro bîyê argumanê sîyasetê AKP-MHPyî.

Tirkîya de vera komelî şero gemarin esto, qirkerdiş esto, merdimî kişîyenê, merdimî maruzê tecawuzî benê, remîyenê, talanê ekonomî estê. Çîyo ke ma tira vanê şero bêusul yan zî şero gemarin no yo. Tirkîya de 24 saetan şero psîkolojîk yeno kerdene û AKP-MHP zî ey îdare keno.

Kurdîstan de dewlete weşananê Hîzbulkontra û hemkaranê ci teşwîq kena. Kurdan rê vana 'mîyanê înan de xo bivînê.' Pê nê waştişan dewlete wazena şikl bida hişê merdiman. Wexto ke no yeno kerdene Kurdîstan de destî nîyeno îdareyanê herêmîyan ser. Şaredarîyî seba Hîzbulkontra û AKPyî bîyî berê rantî û înan rê hetkarîya madî danê. Bi nê hawayî ê dormeyê xo de merdiman anê pêser.''