Alîcan Onlu: Walî ganî îstîfa bikero û Dêrsim ra vejîyo

Hêzanê Kede û Demokrasîyî yê Dêrsimî seba wendekara Zanîngehê Munzurî Gulîstane Doku û serberbûtê îstîsmarê cinsî yê Pêrtagî eşkerayîyêke daye. Alîcan Onluyo ke tewrê çalakî bi vat: Walî herinda qedexekerdişê çalakîyan de ganî îstîfa bikero.

Hêzanê Kede û Demokrasîyî yê Dêrsimî seba wendekara Zanîngehê Munzurî Gulîstane Doku û serberbûtê îstîsmarê cinsî yê Pêrtagî bi şîarê ''Ma do rayîr nêdê pûçîye. Ma wayîrê domananê xo, şaristanê xo û ameyoxê xo vejîyenê'' mîtîngêk organîzê kerd. Bado ke Walîtîya Dêrsimî seba 15 rojan çalakî û aktîvîteyî qedexe kerdî, herinda mîtîng de  Meydanê Seyîd Rizayî de eşkerayîya çepemenîye ameye kerdene. Parlamenterê HDPyî Alîcan Onlu û Mehmet Ruştu Tirkyakî zî tewrê ci bîyî.

Hukmat Vernîya Tecawuzî Akeno

Eşkerayîye de verî Hemsereka HDPyî ya Bajarî Nurşate Yeşîl qisey kerd. Yeşîle  îstîsmarê cinsî yê Pêrtag, Xozat û Pulurî û vînbîyayîşê Gulîstane Doku vîst vîrî û vat: ''Seba ke hêrişkarî nînê cezakerdene şîdet û îstîsmarê cinsî yê vera cinîyan û domanan çend şino zêdîyeno. Hukmat bi qanûnenê neweyan vernîya tecawuzî akeno. Ganî na xeletî ra cade bêro agêreyanê û vera tecawuzkaran cezaya girdî bêrê dayene.''

Dêrsim de Her Game Yena Kontrolkerdene, Tîya Çîyêko Mîyan Nêbeno

Alîcan Onlu zî têkoşînê şarî sey têkişînê anorî name kerd û vat vera nayê yew tewirê bêanorîye zî esto. Onluyî kamerayê polîsan nîşan dayî û vat: ''Tîya hend bêanorîye, tecawuz û qetlîamê cinîyan benê. Nê kamerayî ça de bî? Merdim biney şermîyen. Nê bajarî de hela ke domanan rê tecawuz ameyêne kerdene kamerayê hêzanê asayîşî se kerdêne? Walî hinî walî nîyo. Hemserekê AKP-MHPyî yê bajarî yo.Vano huzurê nê bajarî mexeripnê. Gama ke binê berpirsîyarîya ci de domanan rê tecawuz bîyêne û cinîyî ameyêne qetilkerdene huzurê ey ca de bi. Wexto ke wendekarî, cinî û şar wiriştê lingan ser vera bêanorîye  sere wedart vano huzur xeripnenê. Binê berpirsîyarîya to de no bajar yeno xeripnayene.No şar xora vera to hêrs û kînê xo ranêmojneno?

Bîatê Îqtîdarî Huzurê Tuncelî yo, Xoverdayîş Nasnameyê Dêrsimî yo

Wazenê ke nayî sey çîyêê normalî ramojnê. Walî herinda qedexekerdişê çalakîyan de ganî îstîfa bikero û bajarî terk bikero. Tim vano Dêrsim zaf bihuzur o.  Domanan rê tecawuz beno. Bajar açarîyayo garnîzon. Dêrsim de her game yena kontrolkerdene. Bi rojano derûdorê awbendî de cigêrayîşan kenê.Tîya  Çîyêko mîyan nêbeno. Şima vanê no bajar de asayîş esto. Ya no vatiş zûr o ya zî şima şarî xapînenê cara cigêrayîşo veng kenê. No welat de bajaro tewr bidej Dêrsim o. Qey? Eke çew nasname, anor, ziwan û bawerîya xo red bikero û îqtîdarê faşîstî rê bîat bikero no huzurê Tuncelî yo. Têkoşîno ke wendekarî, cinî û şar bi rojanê danê no nasnameyê Dêrsimî yo. Ganî no têkoşînê anorî yê Dêrsimî her cayê Kurdîstanî ra vila bo.''