Çend rojî verê cu Parlamentera Partîya Çepe Gukaye Akbulut muracatê Dayîrê Xizmetanê Zanîstî yê Meclîsê Federalî kerd û waşt ke wa derheqê hêrişê îxalî yê dewleta tirke yê vera Başûrê Kurdîstanî de cipêrsayîş bikerê ke huqûqê mîyanneteweyî binpay keno.

Raporê dayîreyî ke hema nêameyo parekerdene ANF resayî ci. Raporê 12 de pelan de yeno vatene ke Tirkîya madeyê 51. yê Neteweyê Yewbîyayeyî (NY) binpay kerd. Rapor de bale ameye ser antene ke Tirkîya hêrişî xo sey 'pawitişê meşrû' ramojnena la wexto ke hêrişî bîyî PKKyî hêrişî nêkerdo.

Rapor de ame vatene ke eke dewletêke raştî zaf hêrişan bêro eşkena semedê xo pawitişî hêrişê dewleta bînî bekero la nika dewleta tirke bê ke înan rê hêriş bîyo hewa û erdî ra hêrişê Başûrê Kurdîstanî kena.

Reyna ame vîrardene ke goreyê madeyê 51. yê NYyî dewletêke verî ke bikewo erde yewna dewlete û sewqîyato leşkerî bikero  ganî NYyî ra destûr bigêro. Coka Tirkîya no made binpay kerd. Rapor de bale ameye antene ke dewleta tirkî hêrîşanê verê Başûrî de xeylêk sivîlî qetil kerdî û ame vatene ke no binpaykerdişê  şertanê huqûqê mîyanneteweyî yo.

Dayîreyî vist vîrî ke Fransa badê hêrişê dewleta tirke yê vera Efrînî yo ke 2018î de ame kerdene muracatê Konseyê Asayîşê NYî kerd û Hukmatê Federalî ra waşt ke wa ê zî Fransa sey nimûne bîgerî sey înan bikerî û reyna babete bikirişê rojdemê NATOyî.

Hukmatê Federalî yê Almanya ke hewteyo ravêrteyî de cewab da vernîyazêkê Partîya Çepe raya verêne eşkera ard ziwan ke ê vera îşxalê dewleta tirke yê vera Rojawanî yê.