Amed de semedê wayîrvejîyayîşê tepişteyanê ke vera tecrîdî grevê vêşanîye de yê çalakîyêke ameye organîzekerdene. Polîsan destûr nêda eşkerayîye bêro dayene. Şarî vera nayî bi slogananê xoverdayîşî cewab da.
Semedê wedaritişê tecrîdê serê Rayberê Şarê Kurdî Abdullah Ocalanî di mengî yo tepişteyî grevê vêşanîye de yê. Amed de hetê MEBYA-DERî ra çalakîyêke ameye organîzekerdene.
Wekîlê HDPyî, Mayê Haştîye û merdimê tepişteyan zî tede xeylêk kesî Parka Koşuyolî de ameyî têhet. Polîsan dormeyê înan girewt û destûr nêda eşkerayîye bidê. Êyê ke parke de ameyî têhet şîyî banê HDPyî yê Sûrî. Polîsan narey zî tîya girewt binê ablûqa. Şar tîya ra vera polîsan bi slogananê, ''Wa biciwîyo xoverayîşê zîndanan'' û ''Ma nêtersenê, milê xo çewt nêkenê'' qîra. Dima ra şar ravêrt banê MEBYA-DERî û tîya eşkerayîye ameye dayene.
Eşkerayîye de bale ameye antene zextê serê tepişteyan ser û ame vatene ke şar semedê domananê xo qerqilîyeno. Reyna grevê vêşanîye ameyî vîrardene û ame vengdayene ke wa waştişê tepişteyan bêrê ca ke zîndanan ra hînî tabûtî mevejîyê. Eşkerayîye de ame vatene ke berpirsîyarî têna îdareyê zîndanan ney berpirsîyaro esasî îqtîdaro ke welatî îdare keno yo û ame vatene ke waştişê tepişteyan waştişê înanê ke ganî cade bêrê caardene.
