Artêşa Tirkî xozaya Kurdistanî vêşnena û wêran kena

Artêşa Tirkî ya ke hêrişê herêma Bradostî ya Başûrê Kurdistanî kena, xozaya Kurdistanî zî wêran kena.

Artêşa Tirkî ke herêma Bradostî ya Başûrê Kurdistanî de dest bi hêrişêkê seba îşxalkerdişî kerdo, teyareyanê şerî yê F-16’î ra bi tonan bombayan xozaya Kurdistanî ser o varnena.

Tewr peynî şanê 16’ê Hezîrane de rîyê bombardumanê teyareyanê şerî ra wareyêkê daristanî yê Gelîyê Şêxzadeyî vêşa. Pîya bi dar û tewiranê nebatan xeylî heywanî; pezkovî, xozê kovîyî bîyî hedefê bombardumanî.

Dewijanê Gelîyê Şêxzade ra Rêbaz Mihemedî vat ke hêzê çekdarî yê Tirkan serê wareyanê înan de bombardumananê giranan kenê. Rêbaz Mihemedî veng da hukmatê Başûrê Kurdistanî û hukmatê merkezî yê Iraqî û dormeperweran ke hemverê na hêrişkarîye de tê bigêrê.