Bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan Xeylêk bajaranê Vakurê Kurdîstan û Tirkîya de cinîyî vejîyayî kuçeyan vera şîdet û qirkerdişê ke pê destê dewlete yenê kerdene hersê xo ard ziwan.

Amed çalakîya ke hetê Platformê Cinîyan ê Dîcle Amedî ra ameye organîzekerdene xeylêk kesî tewrê ci bîyî. Cinîyê ke Kayapinar de ameyî têhet pê panktarta ''Wext wextê azadîya cinîyan o'' destpê rayraşîyayîşî kerd. Pîya bi Hemsereka Pêroyî ya DBPyî Salîha Aydeniz û Wekîla HDPyî ya Amedî Remzîye Tosun bi seyan kesî tewrê rayraşîyayîşî bîyî. Cinîyê ke pê kincanê xo yê herêmkî tewrê çalakîye bîyî bale ante hêrişê vera cinîyan ser û mesajê xurtkerdişê têkoşînî dayî.

Dêrsim de zî cinîyê Meydanê Seyîd Rizayî de ameyî têhet. Çalakîye de pankarta ''Şîdet qederê ma nîyo, ma do pêro pîya ê bibedilnê'' ameye akerdene. Endamanê Platformê Cinîyan ê Dêrsimî rixmê varayîşî eşkerayîye daye. Eşkerayîye hetê Fatoş Arginî ra ameye wendene. Eşkerayîye de wedaritişê Pêkerdişê Îstanbulî, zêdbîyayîşê şîdetê serê cinîyan, vînîbîyayîşê Gulîstane Doku, kayê leyminê ke Dêrsimî ser o bitaybetî zî cinîyan ê ciwanan ser yenê kerdene ardîyayî vîrî û ame vatene ke ganî vera heme zextan têkoşîn bêro xutkerdene. Cinîyî têna eşkenê bi yewbîyayîş û paştdayîş payra bimanê û heqanê xo bipawê.

Reyna Şirnex, Mêrdîn, Êlih, Riha, Semsûr, Îstanbul, Adana, Hatay, Anqara, û xeylêk bajaranê bînan de cinîyê ke vejîyayî kuçeyan bi aktîvîteyanê cîya cîayan vera polîtîkaya qirkerdişî ya îqtîdarê AKP-MHPyî nêrazîbîyayîşê xo ard ziwan û vat hukmat se keno wa bikero rixmê heme zextan cinîyî do tim bi vengê berzî biqîrê û wayîrê heqanê xo vejîyê.