Dêrsim de hewteyanê peyênan de waqayê Korona zêdîyayî

Hemserekê SESî yê Dêrsimî Kahraman Yurukî da zanayene ke mabênê 10-25ê teşrîna verêne de 500 waqayê vîrusê Korona ameyî tesbîtkerdene.

Dêrsim de waqayê vîrusê Korona zêdîyenê. Hemserekê Sendîkaya Kedkaranê Xizmetê Komelkî û Weşîye (SES) ya Dêrsimî Kahraman Yurukî derheqê babete de eşkerayîye kerde.

Yurukî da zanayene ke mabênê tarîxanê 10 û 25ê teşrîna verêne de şaristan de 500 waqayê vîrusê Korona ameyî tesbîtkerdene. Yurukî vat: ''Waqayî zêdêr dibistan, zanîngehan de û serranê binê 40î de dîyenê. Şaristan de tay waran de merdimî bêmaske gêrenê û  tedbîran nêgênê.''

Yurukî doneyê derzîna Korona zî pare kerdî. Goreyê nê doneyan şaristan de merdimanê 65 serre ra pîlêran de se ra 90 di dozê derzîne girewtî, merdimanê grûba serranê 20-24 se ra 82 dozêkê derzîne, se ra 67 zî di dozê derzînî girewtî, merdimanê grûba serranê 15-19 ra se ra 60 yew dozê derzîne se ra 40 di dozê derzîne girewtî, merdimanê 15 serre ra qijêran ra zî se ra 36 yew doz se ra 15 zî di dozê derzîne girewtî.