Erdlerzê Xarpêtî: Hûmara merdayan zêdîyena

Hûmara merdayanê erdlerzê Xarpêtî ya bi girdîya 6.8 de resaye 22. Reyna erdlerzê hurdîyî zî dewam kenê.

Bado ke binşewe qezaya Sîvrîce ya Xarpêtî yo bi girdîya 6.8 de erd lerza xebetê cigerayîş û xelisnayîşî dewam kenê. Netîceya erdlerzî de hûmara merdayan resaye 22.

Goreyê eşkerayîya peyêne ya AFADî Xarpêt de 18, Meletî de 4 kesan cuya xo vînî kerde.1031 kesî zî bîrîndar bîyî. Eşkerayîye de ame vatene ke Xarpêt de enkazê hîrê bînayanê de xebatê cigêrayîş û xelisnayîşî dewam kenê. 40 kesî binê enkazî ra ameyî xelisnayene. Goreyê eşkerayîye Xarpêt de 655, Meletî de 226, Amed de 32, Semsûr de 25, Êlih de 6, Mereş de 37, Riha de 50 pêro pîya 1031 kesî birîndar bîyî.

Cinîya digane Pinar Dişlî ya ke binê enkazî ra birîndar ameye xeslisnayene nêşwexane de rixjê heme mudexaleyan nêameye xelisnayene.

Hetê bînî ra erdlerzê hurdîyî zî dewam kenê. Tewr tay 300 erdlerzê hûrdîyî bîyî.

Zîndanê Semsûrî ke ke rîyê erdlerzî ra xesar dî yeno vengkerdene. Tepişteyî sewqê zîndananê Semsûr, Riha û Mereşî benê.

Sûranê Amedî yê tarîxîyan zî erdlerzê Xarpêtî ra zirar dî. Berê Riha û Bêro Çîft de tayî cayî rijîyayî. Cayê ke kerrayî ameyî war bi ekîbanê zabitayan yenê pawitene.

Serdozgerîya Kamare ya Anqara derheqê parekerdişanê medyaya sosyale yê derheqê erdlerzî yê provokatîfan de ciperdayîş da destpêkerdene.