Farisogûllari: Amancê AKP’yî tasfîyekerdişê Kurdan o

Parlamenterê HDP'yî Mûsa Farisogûllariyî ard ziwan ke, AKP-MHP'yî serra 2015 ra nata vera şarê Kurdî planê şerî kerdo dewre û vat, “Armancê rejîmê faşîstî o yo ke Kurdan tasfîye bikero.”

Partîya Şaran a Demokratîke (HDP) ya Bajarê Amedî waşt Parkê Koşuyolu yê Amedî de vera tecrîdkerdişê Rayberê Şarê Kurdî Abdullah Ocalanî û qerarê  Heyetê Weçînayîşê Berzî (YSK) yo ke derheqê şaredaran de dayo, şermezar bikera. Polîsan mudaxeleyê eşkerayîya HDP’yî kerd. Mudexeleyî de Parlamenterê HDP’yî yê Amedî Remzîye Tosune û Mûsa Farîsogûllari bîbî birîndar. Farisogûllariyî derheqê hêrişê serê HDP’yî, tecrîdê girankerdeyî yê serê Rayberê Şarê Kurdî Abdullah Ocalanî û çalakîya grevê vêşanîye de qisey kerd.

Vera Kurdan polîtîkaya çokdayîşî

Farîsogûllariyî ard ziwan ke bi amancê konseptê neweyî yê AKP’yî tasfîyekerdişê Kurdan o û wina vat: “Xeylî wexto vera şarê Kurdî û temsîlkaranê ci hêrişî yenê viraştene. Di rojî verê cû zî polîsanê AKP’yî bi hawayêko hovîtî hêrişê şarê ma kerd. Netîceyê nê hêrişî de xeylî dayîkî, ciwanî zî mîyan de hevala ma Remzîye Tosune û ez birînda bîya. Seba ke merdim nê hêrişan biercno ganî merdim agêro çar serrî verê cû. Serra 2014 de kombîyayîşê MGK’î de vera Kurdan şer ame îlankerdene û polîtîkaya çokdayîşî kerde dewre. Serkêşîya Rayberê Şarê Kurdî Abdullah Ocalanî de seba ke haştîye û demokrasî bêrê nê erdan, pêvînayîşê haştîye ameyî destpêkerdene. Wexto ke pêvînayîşî ameyî destpêkerdene, ke heta ke hetê AKP’yî ra ame xeripîyayene, welat mîyanê aramî û haştîye de bi.”

Merkezê cuye weran kerdî

Farîsogûllariyî ard ziwan ke qerarê şerî yê AKP’î roje bi roje Kurdistan de kewt dewre û wina dewam kerd: “Kurdistan de 12 merkezê sey Sûr, Farqîn, Cizîra Botan, Şirnex, Nisbêbîn, Gever û Gimgim bi topan ameyî bombardumankerdene. Serdestarîya faşîstî ya AKP-MHP’yî çarçewaya polîtîkaya çinkerdişî de hêrişê merkezanê Kurdan kerd, hêrişê cayê cuye ya Kurdan kerd. Bi nê hêrişan waşt ke destkewteyanê Kurdan çin bikerê û Kurdan bê îrade biverdê. Dewamê şerê taybetî Kurdistan de qeyûmî tayîn kerdî, hemşaredar û wekîlê ma  destbend kerdî û tewqîf kerdî. Şarê Kurdî 31’ê Adare de vera polîtîkayanê faşîst yê AKP-MHP’î şi sindoqan ser û hêrsê xo mojna. No hêrsê Kurdan vera tecrîdê girankerdeyî yê serê Rayberê Şarê Kurdî Abdullah Ocalanî yeno kerdene bi.”   

Tecrîd ke bêro wedaritene huzur do bêro

Farîsogûllariyî bale ante serê tecrîdî û vat, “20 serrî yo Rayberê Şarê Kurdî Abdullah Ocalanî tecrîd de yo û 4 serrî yo zî binê tecrîdê mutlaq de yo. Qararê şer ê AKP-MHP’yî sere de Îmraliyî de kewt dewre.  Wexto ke ma tecrîdê mutlaqî de nîyabidê vînenê ke hêzê komplogerî dewre de yê û komloye dewam kena. Na komploye de rolê Tirkîya zî gardîyanî ya. Nê tecrîdî ra CPT û Welatê Ewropa berpirsîyar ê. CPT û Mehkemeya Heqanê Merdiman a Ewropa (MHME) zî seba karanê welatê xo rol û mîsyonê xo nêanê ca. Ne şarê ma ne girewteyî nê tecrîdî qebûl nêkenê. Bi çimanê dişmenî şarê ma de nîyadanê. Ganî êdî nê polîtîkayan ra fek raverdê. Key tecrîd bêro wedaritene, o wext huzur do bêro.”

Xoverdayîş dinya ra vila beno  

Farîsogûllariyî bale ante serê çalakîyanê grevê vêşanîye yê seba wedaritişê tecrîdê girankerdeyî yê serê Ocalanî û vat: “Xoverdayîşê çalakwananê grevê vêşanîye her cayê dinya ra pêl bi pêl vila bi. Xoverdayîşê Leyla Guvene roja 163’ine dewam keno. Hewlêr de xoverdayîşê endamê HDP’yî Nasir Yagizî roja 150’ine de, yê çalakwananê Strasbourgî roja 124’ine de dewam keno. Çalakîya girewteyanê hepisxaneyanê vakurê Kurdistanî û Tirkîya roja 125’ine de dewam kena. Amancê Tecrîdê Îmraliyî şikanîyîşê îradeyê şarê Kurdan o. Wazenê ke bi tecrîd çok bi Kurdan bidê şiknayene. Waştişê çalakwanan waştişê şarê Kurdî yo.”