Gerîlayî Tekîn û Kartal ameyî definkerdene

Gerîlayê HPG’yî Mehmet Reşat Tekîn ( Zana Andok) Amed de Onûr Kartal zî Êlîh de ameyî definkerdene.

Gerîlayê HPG’yî Mehmet Reşat Tekîn ( Zana Andok) û Onûr Kartal yê ke 25’ê Nîsane de pêkewtişê qezaya Licê ya Amedî de şehîd bîyî, rixmê teşîskerdişê keyeyan cenazeyi nêdîyayîbî merdimanê înan. Merdimanê Tekîn û Kartalî dimayê tesbîtkerdişê  testê DNA cenazeyê xo  morgê Nêweşxaneyê Perwerde û Cigêrayîşî yê Gazî Yaşargîlî yê Amedî ra girewtî.

Gerîla Mehmet Reşat Tekîn Amed de Ame Definkerdene

Cenazeya Mehmet Reşat Tekînî Goristanê Yenîkoyî yê Baglarî de ameye definkerdene. Polîsan goristan girewt binê ablûqa û nêverda ke kesêk tewrê merasîmê cenaze bibo. Paramnetera HDP’yî ya Amedî Remzîye Tosûne, hemserekê partiye yê bajarî Zeyyat Ceylan, merdime şehîdan, û xoverdayoxanê grevê vêşanîye yê ke semedê tewrbîyayîşê cenaze ameyî têhet polîs destûr înan nêda. Tena keyeyê Tekînî tewrê definkeridişî bi.

Polîsan Destûrê Nimajê Cenazeya Tekînî Nêda

Polîsan destûr nêda  nimajê cenaze camî de bêro kerdene. Wecîbeyê dînî yê cenaze goristan de ameyî bicaardene. Merdimanê Tekînî Şînxaneyê Hûzûrî yê qezaya Kayapinarî de taziye na ro. Bado zî do qezaya Salîhlî ya Manîsa de do tazîye bêro ronayene.

Gerîla Onûr Kartal Êlîh de Ame Definkerdene

Cenazeyê Onûr Kartalî ya ke wecîbeyê dînî yê ci morge de ameyî bicaardene zî goristanê Asrî yê Êlîhî de ameye definkerdene. Tazîyeya Kartalî merkeze Êlîhî de yena viraştene.

Gerîla Mesût Aktaş Siba do Mêrdîn de Bêro Definkerdene

Mesût Aktaş (Azîz) o ke cenazeya ci heman morge de ya, bi îddîaya asayîşî cenaze nêdîyaye keyeyê ci. Cenazeya Aktaşî siba do Goristanê Mardînkapi de bêro definkerdene.