HDP do 8ê sibate de kampanyaya newî bido destpêkerdene

Hemserekanê Pêroyî yê HDPyî Pervîne Buldan û Mîthat Sancarî da pêhesnayene ke ê do 8ê sibate ra tepîya programê mucadeleyê neweyî bidê destpêkerdene. Hemserekan vat 4 babetê bingeyênî yê na kampanya tecrîd, grevê vêşanîye, dewaya Kobanê û qerarê MHME yê.

HDP kombîyayîşê online yê Heyetê Îdareyanê Cayîyan de  hemşaredaran de reyde ame têhet. Serkêşîya Hemserekanê Pêroyî yê HDPyî Pervîne Buldan û Mîthat Sancarî da rojdemo sîyasî, rolê îdareyanê cayîyan û plankerdişî gerîyayî dest.

Mîthat Sancarî vat:  ''Pê qeyûman wazenê şarê kurdî teslîm bigerê. Wazenê bi mîlyonan kesan bêteslîmîyet biverdê û îradeyê kurdan nas mekerê. Na merheleya newî ya polîtîkaya ke seserran ra nata vera kurdan yena şuxulnayene ya. Meverdê şima wezîfeyê xo bikerê zî serekê şaredarîyan ê meşrû şima yê. Xebatê ma yê newe ra peyser girewtişê şaredarîyan estê la gereka semedê bedilnayîşê nê îqtîdarî nê xebatî bêrê xurtkerdene. Senî ke şima zî  zanê vera ma hêrişêko pîl esto. Wazenê partîye biqefilnê. La ê se kenê wa bikerê nêeşkenê verê ma bîgerê. Peyê ma de paştdayîşê şarî esto û ma wayîrê tecrubeyî yê. Ma do rayîrê xo rê qerardar dewam bikerê. Ma do 8ê sibate de programê mucadeleyî yê neweyî îlan bikerê. Qeraro ke Mehkemeya Heqanê Merdiman ê Ewropa şexsê Demîrtaşî dayo,  nîno caardena. Ma do semedê caardişê nê qerarî xebatan rayra berê. Ma zere de mucadeleyê xo pîl kenê û teber de xebatanê dîplomatîkan kenê û ma zanê ke ma do ser bikewê.''

Pervîne Buldane zî nê vatî: ''Ewro her ca de vera estbîyayîşê kurdan hêriş esto. Rojawan û Başûrê Kudîstanî de hêrişî yenê kerdene. Tirkîya de seba ke kanalê sîyasetî bîyî teng HDPyî rê hêriş yeno kerdene. Vera sîyasetê demokratîkî hêrişêk esto û têna HDP û kurdî hedef de nîyê.  Muxalefetî rê hêriş yeno kerdene.  Îqîtîdar pê hêrişanê vera ma wazeno payra bimano. Ma verî vatbi qeyûm do pê ma sînordar memano. Ewro ma vînenê Unîversîteya Bogaziçi rê qeyûm ame tayînkerdene. Operasyonê vera şaredarîyanê CHPyî rojdem de yê. Verê Dezgehanê Komelê Sîvîlan bi vetişê tay qanûnan ame girewtene. Vera nê hêrişan tewiro hempar û hewce keno.

Dewaya Kobanê do menga nîsane de dest pêbikero. Qerarê MHME qerarêko zaf muhîm o. Pîya bi nînan meseleya tecrîdî esta û vera nayî grevê vêşanîye yê zîndanan esto. Hêrişê vera Kurdîstanî estê. Ma do 8ê sibate de kampanyaya newî bigerê rojdemê xo ke  heta menga hezîrane dewam bikero. Babetê bingeyêne na kampayaya tecrîd, grevê vêşanîye, dewaya Kobanê û qerarê MHME yê. Rojdembîyayîşê înan hem semedê kurdan hem zî semedê hêzanê demokrasîyî muhîm o. Nê meseleyî têna kurdan eleqedar nêkenê, Tirkîya zî eleqedar kenê. Ma yew prosesî danê destpêkerdene ke hêzê demokrasîyî, partîyê sîyasîyî, Dezgehê Komelê Sîvîlî û hetê demokratîkî do tede ca bigerê. Ma do pêro pîya çalakî û aktîvîteyanê hemparan bikerê û netîceya înan bigerê.''