Mehkemeya Îdareyî ya Enqereyî ya 3ine bi qerarê “faydeyê rayapêroyîye yê berzî” heme projeyê awbend û HESan û Projeyê HESî yê Mercanî ke 2003 de dest pêkerdibi îptal kerdî.

Meclîsê Wa Munzur Bi Azadî Biherekîyo derheqê qerarê bi qerarê Mehkemeya Îdareyî ya Enqereyî ya 3ine de eşkerayîyêka çapemenîye organîze kerde. Beşê Wa Munzur Bi Azadî Biherekîyo, hunermend Erdogan Emîr û xeylî hemwelatijî tewrê eşkerayîya ke Zîyara Ana Fatma de amî dayene bîyî.

5 RAPORÊ ÎLIMKÎYÎ AMEYÎ HADREKERDENE

Bariş Yildirimo ke eşkerayî wende da zanayene ke înan seba îptalkerdişê projeyanê awbend û HESan Dadgeha Îdarî ya Berze de dewa akerda. 2010 ra nata dewa de averşîyayîşî virazîyayî û tewr peynî Mehkemeya Îdareyî ya Enqereyî ya 3ine bi qerarê “faydeyê rayapêroyîye yê berzî” heme projeyê awbend û HESan îptal kerdî. Yildirimî vat ke qerar netîceyê 5 raporanê îlimkîyan ê ke hetê xeylî unîversîteyan ra ameybî hadrekerdene gîrîya.

Yildirimî da zanayene ke qerar da ameyo vatene ke ‘heta qerarê raporê Ercnayîşê Tesîrê Dormekîyî (ÇED) lazim nêyo nêro girewtene, viraştişê awbend û HESan do hetê huqûqîyî ra biîsabet nêbo.’ 

Yildirimî eşkerayîye de ard ziwan ke qerar hetê Parkanê Milîyan û Mewzuatê Plankarîye ra wayîrê wesfê emsalî yo û nê vatî: “Seba awbend û HESanê ke Parkê Milîyî yê Dereyê Munzurî de yenê plankerdene hendî bi projeyanê cîya cîyayan nê ganî seba heme projeyan pêro pêser de prosesê ÇEDî bêro bicaardene. Bi nê hetê xo qerar wayîrê wesfêkê ewilênî yo.”   

Yildirimî vat bi nê qerarî heme awanî û fealîyetê ke kewenê çarçiwaya Planê Averşîyayîşî yê Bidewreyê Dergî yê Parkê Milîyî yê Dereyê Munzurî zî kewtê halêkê bêhuqûqî û no qerar tesîrê Projeyê HESî yê Mercanî ke hewna fealîyet de yo zî keno.

Yildirimî peynîya qiseykerdişê xo de wina vat: “No qerar wa Parkê Milîyî yê Dereyê Munzurî ke Lîsteya Mîrasê Kulturî yê Dinya de yo û parkê milî yo tewr rind yê welatê ma û heta yê hemeyê dinya yo rê bixêr bo… Tarîxê Tirkîye de reya ewilêne bi qerarê ‘faydeyê rayapêroyîye yê berzî’ çîyî hetê mehkemayêk ra ameyê îptalkerdene.”