Virusê Korona yo newe Covid-19 yo ke menga kanûne de Çîn de vejîya meydan û bi desan welatan ra vila bi badê Îranî Iraq û Rojhelatê Kurdîstanî zî vistê alarm.

Bado ke Necef, Bexdad û tewr peynî de Kerkuk de virusê Korona ame tesbîtkerdene  Kerkuk de semedê tedbîrî dibistanî bêdem û daîreyê fermîyî semedê 15 rojan ameyî qefilnayene. Reyna sixletîyê sey veyve û şînî ke şar yeno têhet ameyî vindarnayene. Heme noqtayê dewketişê Kerkukî gerîyayî binê kontrolî, heta ke testê weşî nêrê kerdene kes nêeşkeno bikewo bajar.

Bi qesawetê virusê Korona Silêmanî de zî walîtîye qerar girewt ke 26ê sibate ra heta 24ê adare heme dibistanî û daîreyê fermîyî do bêrê qefilnayene.

Îran de goreyê doneyanê fermîyan tewr tay 61 vakayî ameyî tesbîtkerdene û 16 kesan wefat kerd. Hetkarê Wezîre Weşîye de zî vîrus ame tesbîtkerdene. Bajarê Kumî de wezîrêk vat têna nê bajar de 50 kesî virus ra merdî. Selahîyetdaranê Îranî na îdîa red kerd, vat raşt nîyo.