KJK: Ma perwerdeyê kurdkî û sîstemê hemserekîye ra tawîz nêdanê

Koordînasyonê KJKyî rexne kerd ke tay partîyî derheqê kurdkî û hemserekîye de ke hedefê hêrişanê kolonyalîstan de yê, nîqaşan kenê û vat ke nê di babetan ra qet yew tawîz do nêro dayene.

Koordînasyonê KJKyî  derheqê nîqaşanê seba kurdkî û hemserekîye de eşkerayîyêka nuştekîye daye.

Eşkerayîya KCKyî wina ya:

''Netîceya qedexeyê kurdkî de Vakurê Kurdîstanî de kirdkî (zazakî) ha bena vînî û kurmancî zî heman tehlukeyî redye têrî ya. Reyna vera azadîya cinîyan zî tewr zaf nê wextî de dişmenîye yena kerdene. Polîtîkaya şerê taybetî ya vera cinîyan ê kurdan, xîretê wedaritişê Peymana Îstanbulî parçeyê na dişmenîya vera cinîyan ê. Dest nîyeno pêro destkewteyanê cinîyan ser. Temsîlîya têdûşte û hemserekîye sey sûcêkî hesibîyenê. Hukmato faşîst û dişmenê cinîyan bi pederşahîye payan ser o vindeno.

Vakurê Kurdîstanî de cinîyî vera nê hêrişan bi kampanya û hemleyan xo ver danê û têkoşîn kenê. Rixmê hende teda, îşkence, tepiştiş û qedexeyan zî cinîyê kurdî bi fedakarî ayberîya têkoşîn û xoverdayîşê şarê ma kenê.  Îqtîdaro faşîsto ke waştêne kurdan qir bikero, qels bîyo û her hetî ra mîyanê krîzî de yo. Polîtîkaya ci ya teberî tecrîd û eşkera bîye. 

Tewirê ENKSî nêno qebulkerdene

Nêzdîbîyayîşê dewleta tirke ya faşîste yê bi kurdkî û hemserekîye zanîyeno. La tay partîyê kurdan bi hawayêkê negatîfî nêzdîyê perwerdeyê bi kurdkî û sîstemê hemserekîye benê, nê babetan ser o nîqaşan kenê, nê babetan kenê çeka sîyasetî. Nê tewirê înan yewîya neteweyîye rê nêşino.Ma derheqê nê babetan de paştî danê eşkerayîyanê Îdareyê Xoserî û Kongreya Starî. Qet yew rêxistin û partîya Kurdîstanî sey şertê yewîya neteweyîye nêeşkena vaja ke 'wa kurdkî nê erebkî biba ziwanê perwerdeyî' 

Hemserekîye destkewteyê cinîyan ê kurdan o

Sîstemê hemserekîye û temsîlîya têdûşte netîceya hîşmendîya azadîye ya Rayber Apoyî de aver şîyî û artêşbîyayîş û gerîlatîya cinîyan ra dima bi ked û bedelanê pîlan ameyî pratîzekerdene. Şarê ma şorişê cinîyan û sîstemê cinîyan bi xîret û xebetanê bêhempayan ho aver beno. Şorişê cinîyan ewro her hetî ra Rojawan de yeno caardene. Xoverdayîşê YPJyî hetê pêro dinya ra şinasîyeno. ENKSî tewr nêbo wa îradeyê şerwanan ê cinîyan rê, şehîdan ê cinîyan rê û xeta azadîya cinîyan rê hûrmet bikerdêne û pêşnîyazo winasêne qet nêardêne. Nê babetî ganî masayan de bêrê nîqaşkerdene.

Ewro sîstemê hemserekîye Vakur, Başûr, Rojawan, Rojhelat û pêro Ewropa de pêro xebatanê ma de yeno caardene. Hemserekîye hînî rojdemê pêro dinya de ya. Xebeta hemserekîye pêro dinya rê tesîr kena, komel azadî û têdûştîye ser o vurnena û bingeyê azadî û têdûştîye awan kena. Hemserekîye Kurdîstan de garantîya cuya rûmetêne ya şarê ma ya.

Tawîz do nêro dayene

Perwerdeyê bi kurdkî û sîstemê hemserekîye  krîterê ma yê verênî yê û nê babatan ra qet tawîz do nêro dayene. Têkoşînê demokrasî û azadîye wexto ke nasnameyê azadî yê cinîyan û kultur û ziwanê kurdan reyde yew bibo do bêro caardene. Ganî yewîya neteweyîye ya kurdan bingeyê cinîya azade û komelê azadî ser o bêra ronayene. Ma venga pêro şarê xo danê ke seba ke ziwanê dayîke aver şoro û hemserekîye-temsîlîya têdûşte bêra caardene têkoşîn pil bikero.

Ma kurdkî pêro waran de aver berê

Çarçewa Hemleya 'Vera qirkerdişê cinîyan komel û cinîya azade bipawê' ya KJKyî de ma venga pêro cinîyanê Kurdîstanî, cinîyan kurdan ê Ewropa, meclîsanê ma yê cinîyan, şarê ma danê ke kurdkî seba azadbîyayîş şerto verên o coka ma pîya vera polîtîkayanê asîmîlasyonî pêro waran de kurdkî aver berê. Komelo ke seba ziwanê xo nêciwîyeno merdo.  Komelo ke nêeşkayo ziwanê xo bipawo nêeşkeno qala cuya rûmetêne bikero.

Ma hemserekîye û têmsîlîya têdûşte pîl bikerê

Azadîya cinîyan û azadîya kurdan yewbînan ra cîya nêbenê. Coka ganî ma modelê hemserekîye û temsîlîya têdûşte bipawê û aver berê. Ma xebatanê cinîyan ra gamêke zî apey nêerzê û bi înadê pîlî xoverdayîş berz bikerê. Ganî rojdemo verên ê kampanya û hemleyanê cinîyan perwerdeyê bi ziwanê dayîke û pawitişê sîstemê hemserekîye bibo.''