Kultur û ziwanê Kurdî Marsîlya de dîya naskerdene

Bajarê Marsîlya yê Fransa de “Forûmê ziwanê ke ver bi çinbîyayîşî yê” ame viraştene.

Forûm de kultur û ziwanê Kurdî dîya naskerdene. Nûştox, krîtîkkerdox, açarnayox û cigêrayoxo Kurd Dr. Îbrahîm Seydo Aydoganî forûm de derheqê kultur, ziwan û tarîxê Kurdan de yew pêşkêşîye kerde. Fotografkêşo Kurd Dogan Boztaşo ke Marsîlya de yo, pêramotişê xo yê fotografan kerd. Heman wextî de fîlmê dîrektoro Kurd Garîp Çelîkî yê derheqê cuya Cemîle Çagirga ya 10 serrî ke Cizîre de hetê hêzanê rejîmê Tirkî ra amî qetilkerdene, ame ramotene.

Forûm Kompleksê Kulturî yê mehlaya Belle De Maî de virazîya û kultur û ziwanê ke verê çinbîyayîşî de yê dîyayî naskerdene. Hunermendanê TEV-ÇAND’î konserêko qijkek da beşdaran.

Çalakîye de derheqê kultur û ziwanê Kurdî de konferansêk ame viraştene. Dr. Îbrahîm Seydo Aydoganî konferans de qisey kerd û vat, “Welatanê ke heqê cuye yê Kurdan talan kerdê, Kurdan sey barbar vînenê. Xo zî sey modern vînenê. Kurdan hemverê çeteyanê DAÎŞ’î de seba dinya şer kerd û bi ser kewtî. Cinîyê Kurdî tewrê nê mucadeleyî bîyî. Dimayo ke DAÎŞ ame binfînayene, xeylî welatê Ewropayijî hemverê pênaseyê “terorî” yê dewleta Tirkîya ke qey Kurdan şuxulnena bêveng mendî. Tirkîya bi naye zî qîmê xo nêard û Efrîn îşxal kerd. Nika Efrîn de domanî bi ziwanê xo nê la bi ziwanê Tirkî yenê perwerdekerdene. Her siba neçar yenê verdayene ke vajê ‘wa estbîyayîşê mi estbîyayîşê Tirkî rê xelate bo.’ Wazenê ke bi nê hawayî kultur û ziwanê Kurdî çin bikerê.”