Xarpêt: Seferberîya erdlerzî esta la çîyêk nêresa ma

Mexduranê erdlerzî yê Sîvrîce yê ke keyeyê ci rijîyayî û nêeşkenê tede bimanê vat: "Seferberîya erdlerzî dest pêkerde la hetkarîyêke nêresaye ma."

Mexdurîyetê erdlerzo ke 24ê çeleyî de qewimîya dewam kenê. Mexdurê erdlerzî yê Sîvrîce yê ke keyeyê înan rijîyayî seba ke zaf qerqilîyenê nêşinê keyeyanê xo de nêmanenê. Mesela germbîyayîşî zî bi heman hawayî dewam kena.  

Dewa Duygulu de ke sînorê Meletî de ya  zaf keyeyî erdlerz de texrîb bîyî. Dewijî xeymanê AFADî de ciwîyenê. Dewijî seba ke herême de hewa zaf serd o nêeşkenê xeyman de bimanê. Dewijan waşt ke selahîyetdarî cade seba mendişî çareserîyêka bîne bivînî.

Dewa Tarlatepe de zî keyeyî texrîb bîyî. Dewijanê Tarlatepe eşkera kerd ke hema zî hetkarîyêke nêresaye dewe. Hemwelat Ramazan Îndîbayî vat: "Ma tersenê ke keyeyan de bimanê. Vanê seferberîya erdlerzî dest pêkerd la heta nika hetkarîyêke nêresaye ma. Çew nêame dewa ma. Halê ma perîşan o.''

Burhan Dengizo ke şewa erdlerzî de seba dadîya xo ame dewe vat: "Seba ke keyeyê ma texrîb bîyî ma xeyman de manenê. La ma nêeşkenê xo germ bikerê. Semedo ke hewa serd o her kes bi nêweş. Ma hînî nêeşkenê nê xeyman de bimanê. Ganî çareserîyêka mende bêra dîyene."

Mexduranê erdlerzî yê Sîvrîce yê ke keyeyê ci rijîyayî û nêeşkenê tede bimanê vat: "Seferberîya erdlerzî dest pêkerde la hetkarîyêke nêresaye ma."