Namzedê Çewlîgî: Ma do şarederîye AKP’yî ra bigêrê

Namzedê hemşaredarîya Çewlîgî Senem Çakase û Hîşyar Ozsoyî derheqê projeyanê xo de qisey kerd û vat ke ê do şaredarîye AKP’yî ra bigêrê û bi şarê xo projeyanê xo bica bîyarê.

Namzedê  hemşaredarîya Çewlîgî Senem Çakase û Hîşyar Ozsoyî bi qerardarîya girde vanê ke ê do şaredarîya merkezî ke destê AKP’yî de ya bigêrê. Çakase û Ozsoyî  vanê ke şarê Çewlîgî vera AKP’yî zaf dekerde yo, bihers o. Coka ma wazenê ke şaredarîye bigêrê û şarê xo rê xizmet bikerê.

Ma do bi destê cinîyan Çewlîgo newe înşa bikerê

 Çakase derheqê projeyanê înan de nê vatî: ‘‘Ma do meclîsanê mehlayan û cinîyan rona goreyê nînan îhtîyacanê şarî bitaybetî zî yê cinîyan tesbît bikê û wina bîyarê ca. Seba ke cinîyî keye ra vejî, emegê înan bieso û linganê xo ser vinderê ,ma do înan rê îmkananê gureyî  bîyare ra. Semedê cinîyê ke xebityenê û heme cinîyan ê bînan merkezê bajarî de, ma do 5 kreşanê bêdestmican ronê. Reyna semedê cinîyan, ciwanan û qijan cayê kultur û sporî bêrî awankerdene. Seba ke qijê ma ziwanê dayîke xo vîra nêkerê do kursê Zazakî û Kirdaskî bêrê akerdene. Ma do bi destê cinîyan Çewlîgo newe înşa bikerê. Ma aşitî û way-biratîye wazenê. Wazenê ke bi ziwan, kultur û nasnameye xo biciwîyê. Coka partîya ma partîya şaran a. Wazenê ke bi ters û xof vernîya ma bîgêrê. La ma verê tersî de çok nêdanê. 1’ê Nîsane de ma do ser bikewê.‘‘

Ma do bi sendîqa û rexistinanê bajarî semdê xurtkerdişê ekonomîya herême  tê bigêrê

Hîşyar Oszoyî zî vist vîrî ke namzedê bînî yê Çewlîgî tena qalê de estî û va: ‘‘Ma vaatê înan goştarî kerdî. Qalanê girdan ê ke binê de do bêrê medene kenê. Vanê ke ‘eke ma ser bikewê heme meseleyê Çewlîgî hal benê û bêkarîye do bêro qedîyayene.‘Çi hewfo ke çîyêko wînayên nêbeno. Butçeya şaredarîye xo ra bewlî ya. Ma wazenê ke na butçe meseleyanê bajarî yê esasîyan rê bişuxulnê. Fantazîyê ma sey înan ê Çewlîgî sey Parîs û Londra kerdişî çîn ê. Xora no raşt zî nêyo.  Çewlîg wa bi kultur, ziwan, nasnameyê  û tarîxê xo sey xo bimano. Şar wa xizmatanê esasan ra feyde bivîno. Stantdartê cuya şarî wa berz bê. Çunku xeylî wexto ke no bajar de mix nêameyo kuwayêne. Awa şimitişî ra heta otopark, trafîk problemê Çewlîgî zaf ê. Ma wazenê înan çare bikerê û hetêk ra koordînayonê ekonomîya herême ronê. Ma wazenê bi sendîqa û rexistinanê bajarî semedê  xurtkerdişê ekonomîya herême  tê bigêrê, projayan virazê. Xora şaredarîya ke ma gênê sey enkaz a.120 mîlyon butçeya ci esta. Goreyê eşnawitişanê ma  170 mîlyon deynê ci esto. Ma butçe bi paştdayîşê teberî do xurt bikerê. Demo kilm de nê problemî hal nêbenê. Ez bawer kena ke  eke ma 5 serrî plankerde tê bigêrê ma do xeylî probleman çareser bikerê.  Çewlîg de ciwanî rîyê bêkarîye ra batal gêrênê.  Xora maddeyê heşberdoxî û xokiştiş meseleyê gird ê ciwanan ê. Ciwanê ameyox ra bêumîd ê. Ma do  ciwanan rê butçe cîya bikerê û paşt bidê înan. Çewlîg zî do sey cayanê bînan paşt bido HDP  û AKP’yî ra bixelisyo û xo bi xo îdare bikero.‘‘