Ocalan qalê Îmraliyî keno – IV

“Tewirê mi de hadrebîyayîşêkê seba aşitî û pêameyîşêkê demokratîkî yê lezî esto, hetêna ra zî hemverê şerêkê îmhayî de ke do meşte ra beno ke mi ra dest pê bikero vindertiş esto, bi bawerî, qerardarî û hadreyî hemverê nê de cewab dayîş esto.”

Rayberê Şarê Kurdî Abdullah Ocalanî sîstemê Îmraliyî zî sey perçeyêkê Komploya Mîyanneteweyîye vîneno. Ûca tena sey zîndanêk nê sey cayo ke modernîteya kapîtalîste şexsê ci de şarê Kurdî û şarê herême xo rê hedef girewto vîneno. Ocalan nûşteyan û pêvînayîşanê xo de nê sîstemî tehlîl keno, senî mucadeleyêkê pîlî hemverê nê sîstemî de dano îfade keno.

Kitabê Ocalanî yê bi nameyê ‘PAWITIŞÊ MHMEYÎ – DEWLETA SUMERE YA RAHIBAN RA VER BI KOMARA ŞARÎ’ de prosesê komploye û rastîya Îmraliyî bi eşkerayî arîyenê verê çiman. Ma qismê çarinî pare kenê:

ÎNAN WAŞT KE TEWIRÊ MI TEHRÎB BIKERÊ

Goreyê mi kerdişê pawitişê mi sey ‘pêkerdoxo demokratîk û mesajê aşitîye’ tewiro tewr rast bi. Seba pawtişêkê hîrayî ne dem, ne materyal ne zî hetê hadreyîya psîkolojîke ra munasib bî. Derheqê prosesê Îmraliyî de xeylî eşkerayîyê mi bî. Tayê dormeyan zere de û teber de waşt ke tewirê mi tehrîb bikerê. Çîyo tewr xeternak no bi. Nê xusûsîyetê ke weşîya mi cuya mi ra muhîmêrî bî mi waşt ke înan eşkera bikerî. Propagandaya ke vila bîye na bîye “ê dewleta xorîne û Serfermandarîye dir pêkerdo û teslîm bîyo.” No seba propaganda bi; hem hetgêranê ci yê zereyî û hem zî yê teberî waştêne ke rîyê xo yê rastekînî binimnê. Eke pêkerdişêk bibîyêne nê halî îlankerdiş mi do sey rûmetêk bizanayêne.   

Mi tim vat ke halêko winayên çinyo. Ez verî ra babeta adirbestî ser o vinderta. Mi qerarê ancîyayîşê teberê sînoran zî seba ke adirbest hîna rastekîn bibo sey gamêka dîyine eşte. Halo nikayên de seba şertanê mecbûrîyan hêzêko bisînor zere de, qismo pîl zî teber de bingeyê pawitişê meşruyî de xo bica kerdo.  

HÊZÊ PKKYÎ, ŞEHÎDÊ CI Û ŞARÊ CO WERTE DE YO

Eke sîyaset çareserî de berpirsîyarîyanê xo bica nêaro tehluke esto ke atmosferêkê şidetî yo hîna pîl û yo derg virazîyo. Pêkerdiş eke termê ‘komara demokratîke û laîke’ cuye de bica bêro do virazîyo. Heqê ke rîyê serewedartişan ra heta ewro ameyê înkarkerdene eke bêrê naskerdene, ma eşkenê virazîyayîşê çareserî bipawê. Yeno pawitene ke Kurdî sey hemwelatijê azadî bêrê vînayene û sey şar zî heqê înan ê unîversalî peymeyanê huqûqîyan de bêrê naskerdene û bi nê hawayî komare dir bibê yew. No nizdbîyayîşêko stratejîk o.

Seba ke programê dewrê neweyî yê taktîk û stratejîkî yê PKKyî de no tewir bica ameyo ez do tîya tekrar nêkerî. Tîya heto ke ganî polîtîkaya xo û tewirê xo net bikero duştê dewlete yo berz o. Na rastî tenya seba Kurdanê Tirkîya nê, seba Kurdanê heme perçeyan sey nizdbîyayîşêko stratejîk yena ercnayene. Rastî hende eşkera ya. La tayê dormeyê bexûd û xaînî îftîra kenê û vanê: “Apo meseleyê Kurdan Îmrali de binerd keno.” Ganî nê zaf rind bêrê teqîbkerdene û hesab bêro persayene.   

Na kampanyaya îftîra û tarîkerdişî ya ke xusûsen hetê dormeyanê hemkaran ê Başûrê Kurdistanî û dormeyê ke şîyê Ewropa û cuya xo serê antî-Apoperwerîye de domnenê yena rayraberdene do înan nêxelisno. PKK bi tewirê xo yê şer û aşitî werte de yo. Bi hêz, şehîd û şarê xo werte de yo. Nê kamca yê? Şer wazenê. O wext kamî vernîya înan girewta? Ê bi nê tewirê xo kamî rê xizmet kenê? Wa zere û teber de heta peynî xo ver bidê ke wa bêro zanayene ê sextekar û îftîrakar nêyê.

PDK Û YNK QE MEBO WA TÎYA RA TEPÎYA DURUST BÊ

Hemkarê Başûrijî des serrî yo ke paştîya PKKyî ra mîyanê xeyalê otonomî de yê. Hem YNK û hem zî PDK hemverê PKKyî de kewtî mîyanê tewiranê dehşetan. Seba înan di rayîrî estbî: Yan do bi samîmîyet pêkerdişê demokratîkî biviraştêne yan zî fek otonomîya ke heq nêkerdebî û bê PKKyî zî nêeşkayêne bi dest bifînê ra fek vera bidayêne. Zirarê nînan ê çewres serrî serdestîya hêzanê xerîban ê çar hezar serrî ra hîna vêşêr o. Qe mebo wa tîya ra tepîya bibê surust û bêrê rayîrê demokrasî û aşitî ser. Halêkê eksî de dinya zî bêro do nêeşko înan halê ke kewtê ci ra bixelisno.

KOMPLO BIDESTFÎNAYÎŞÊ NETÎCEYE RA DÛRÎ YA

Prosesê mi yê Îmraliyî do goreyê ruhê nê pawitişê mi dewam bikero. Tewirê mi de hadrebîyayîşêkê seba aşitî û pêameyîşêkê demokratîkî yê lezî esto, hetêna ra zî hemverê şerêkê îmhayî de ke do meşte ra beno ke mi ra dest pê bikero vindertiş esto, bi bawerî, qerardarî û hadreyî hemverê nê de cewab dayîş esto. Zanayîşê pabestîye û goreyê peymeyan têgêrayîş xeylî muhîm o.

Komploya 9-15ê Teşrîna verêne komploya tewr hîra ya ke serê şarê ma de dewrê Sumerîyan ra yena bicaardene, ewro na komplo netîceya ke wazena û plan kena ra dûrî ya. Na komploya ke heme xaîn û hemkarê seserra 20. binê îradeyê emperyalîstî yê tewr pîlî de ardê têhet ganî bêro açarnayene bi aşitîyêka tarîxkîye ya Anatolya û Mezopotamya, no gure vernîya şarê ma û heme hêzanê berpirsîyaran de yo. Nê gureyî rê wayîrvejîyayîş hem seba yewîya xurte ya welatî û hem zî seba yewîya cewherîye ya komara laîk û demokratîke tewiro tena yo rast o. No heman wextî de rayîrê aşitî, biratî, azadî û seypêyîya ke tarîx ra nata yena waştene yo zî.  

Do dewam bikero....