'Polîsan waşt ke ez vera Leyla Guven îfade bida'

Şahîde Evîndare Oruça ke vera Hemsereka KCDyî Leyla Guven îfade dabi, îtîraf kerd û vat: ''Polîsan mi rê vat 'Ti Leyla Guven teşhîs bikera dozger do hetkarîya to bikero.' ''

Derheqê Hemsereka KCDyî Leyla Guven de bi îdîaya 'îdareyê rêxistine' dewa amebî akerdene. Roniştişo 12. yê dewa Mehkemeya Cezaya Girane ya Amedî de ame kerdene. Guvene tewra roniştişî nêbîye. Evîndare Oruça ke vera Leyla Guven îfade dabi, bi rayîrê SEGBÎSî tewra roniştişî bîye.

Evîndare Oruç pare kerd ke a Leyla Guven sey wekîlêke şinasnena û nêzanena ke PKKyî reyde yew têkilîya ci esta yan nê. Oruçe vat: ''Wexto ke mi îfade dayêne polîsan mi rê vat  'Ti Leyla Guven teşhîs bikera dozger do hetkarîya to bikero.' Seba hetkarîye mi zî zabitnameyê teşhîsî îmza kerd. Ez eşkera vana ke Leylaya ke ez berda Îstanbulî û Leyla Guven heman kes nîyê.''

Roniştiş taloqê 18ê teşrîna peyêne bi.