Rejîmê Îranî 2 tepişteyê sîyasî yê kurdî darde kerdî

Rejîmê Îranî di tepişteyê sîyasî yê kurdî yê ke Zîndanê Ûrmîye yê Rojhelatê Kurdîstanî de mendêne darde kerdî.

Goreyê raporê Torra Heqanê Merdiman ê Kurdîstanî şewa bîne saete 00:30 de rejîmê Îranî tepişteyê sîyasî yê kurdî Sebir Şêxzade û Dîyako Resulzade darde kerdî. Nê di tepişteyî vizêr ameybî berdene bi hucreyanê yewkesî yê Zîndanê Ûrmîye û şewa bîne zî ameyî berdene bi cayê dardekerdişî.

Rêxistina Efû ya Mîyanneteweyîye vizêr pê eşkerayîyêke selahîyedaranê Îranî ra waştbi ke cezaya dardekerdişî bêra vindartene.

Rêxistina Heqanê Merdiman a Îranî zî da zanayene ke verî ke tepişteyî bêrê dardekerdene keye û merdimê xo nêdîyî. Rêxistine vat: ''Sebir û Dîyako sûcê ke îsnatê ci bîyî hem mehkeme de hem zî cigêrayîş de red kerdî.''

Torra Heqê Merdiman ê Kurdîstanî zî wina vat: ''Zaf reyî heqê wird tepişteyan ameyî binpaykerdene. Ci rê îşkence ame kerdene, pê zorî ci rê îtîraf ame waştene û nê îtîrafî televîzyonê Îranî de weşanîyayî. Bi hawayêkê bêusûlî ci rê cezaya dardekerdişî ameye dayene.''

Goreyê Rêxistina Heqanê Merdiman cenazayê tepişteyan keyeyanê ci rê nêameyî teslîmkerdene.

Sabir Şêxzade û Dîyako Resulzade adara 2014î de hetê hêzanê Îtlaetî ra Mahabad de ameybî destbendkerdene. Tepişteyî pê îdîaya ke merasîmêkê Mahabadî de 9ê êlula 2010î de mayîn teqabi, ameybî sûcdarkerdene. La 22ê êlula 2010î de fermandarêkê Îranî pare kerdbi ke înan mesuldarê teqayîşî kiştî.