Teqayîşê Dêrsimî de 2 domanan cuya xo vînî kerde

Teqayîşo ke Pulur de virazîya, tede 2 domanan cuya xo vînî kerde. Walîtîye, eşkerayîye de vat teqemenîya ke bi dest ameya viraştene (EYP) ya; keyeyê Guloglû zî ard ziwan ke teqayîş mayîna ke 10 metreyî dûrê xeyma înan de bîya, aye ra virazîyayo.

Teqayîşo ke gomê Çakilyayla yê dewa Bîlgeç a qezaya Pulurî ya Dêrsimî de virazîya, tede Ayaz Guloglûyî (8) cuya xo vînî kerde, Nûpelda Guloglû ya 4 serrî ya ke bi giranî birîndar bîye amî berdene bi Nêweşxaneyê Unîversîteya Firatî ya Xarpêtî. Rixmê heme mudaxeleyanê ke nêweşxane de ameyî kerdene Nûpelda Guloglû cuya xo vînî kerde.    

Walîtîya Dêrsimî ya ke derheqê teqayîşî de eşkerayî daye, îdîa kerd ke teqayîş rîyê teqemenîyêk ke hetê endamanê organîzasyonî ra herême de verê cû ameya ronayene virazîyayo. 

Keyeyê  Guloglûyî zî eşkerayîya walîtîye zûrî vete, vat ke teqayîş EYP ra nê, mayîne ra virazîyayo. Dedê domananê ke cuya xo vînî kerda Zeynel Guloglûyî zî vat teqayîş 10 metreyî dûrê xeyma înan de, cayê kaykerdişî yê domanan de virazîyayo û persa çi karê EYP’yî zereyê dewe de esto. Ded Guloglûyî vat herême de operasyon zî çino, leşkerî zî çinê û texmînê xo de vat ke teqayîş rîyê mayîna ke verê cû ameya ronayene ra virazîyayo.