Zîndanê Hesekê de çi qewimîyeno?

Tepişteyanê DAÎŞî yê ke Îdareyo Xoser bi serran o ke bale anceno tehlukeyê înan ser Zîndanê Hesekê de têmîyanekîye vete. Selahîyetdarêkê zîndanî vat zîndan de rewşa îstîsnayîye ameye îlankerdene.

Tepişteyanê DAÎŞî yê ke Îdareyo Xoser bi serran o ke bale anceno tehlukeyê înan ser Zîndanê Hesekê de têmîyanekîye vete. Selahîyetdarêkê zîndanî vat zîndan de rewşa îstîsnayîye ameye îlankerdene.

Temîyankewtişo  ke yewşeme saete 20:00 de dest pêkerd. DAÎŞijanê ke bi hawayêkê rêxistinbîyayî têgêrayî, şert û mercê zîndanî bahane kerdî û xîret kerd ke wezîfedaranê asayîşî sey esîr bigêrê. Nêmeyê şewe rewşe giranêr bîye. Selahîyedarê zîndanî yê têkilîyanê bi koalîsyonê mîyanneteweyî ra berpirsîyar Rûbar Hesenî ANFyî reyde qisey kerd û vat: ''Cergê DAÎŞî zîndan de saete 20:00 de sere wedarit. Hesenî îfade kerd ke cergan bi malzemeyanê pakîye nuşteyê ''Ma hetkarîya merdimîye wazenê'' batanîyan ser o nuşt û venga koalîsyonî û Xeçê Sûrî da. Hesenî vat: ''Dima ke batanîyayê nuştekîyî ameyî akerdene, berî şikîyayî, kamerayî şikîyayî. Dima zî pê parçeyê berî yê şikiteyî dêsî ameyî rîjnayene. Tay beşê zîndanî kewtî binê kontrolê cergan. Hêzê ma bi temamî goreyê rewşa îstîsnayîye têgêrenê.''

Selahîyetdarî ard ziwan ke seba ke hûmara tepişteyan zêdêr a ê seba mudaxele pabeyê serê sibayî yê. Goreyê zanayîşanê ke resayî ANF, tay tepişteyî remayî. Nêmeyê şewe ra dima zî kontrolê zîndanî nêame destvistene. Hêzanê QSDyî teberê zîndanî de tebdîrê giranî girewtî, pêro rayîrê zîndanî qefilnayî. Teyarayê koalîsyonê mîyanneteweyî Hesekê û zîndanî ser o perenê.  Goreyê zanayîşan tepişteyan saete 00:35 de zîndan de şewat vet.

Îdareyo Xoser: Ganî komelo mîyanneteweyî çareserîyêke peyda bikero

Tepişteyê DAÎŞî yê Rojawanî wextêkî dergî ra nata benê semedê qesawetî. Îdareyê Xoserî çend rey venga dewletanê xerîban da ke seba DAÎŞijanê ke hemwelatîyê înan ê, çareserîyêke peyda bikerê. Babeta hukmkerdişî de hêzê mîyanneteweyîyî bêveng mendî û mesele pey goş kerde. Îdareyê Xoserî pêşnîyaz kerdbi ke herême de mehkemeyêka mîyanneteweyîye bêra ronayene û hukmkerdiş bêro caardene.

Îdareyê Xoserî tewr peyên 23ê adare de serrgêra yewîne ya serkewtişê vera DAÎŞî de eşkerayîyêke dabi û vatbi: ''Bi hezaran cergê DAÎŞî yê tepişteyî û keyeyî xîret kenê ke biremê. Netîceya naye seba dinya do bitehluke biba. Rêxistine xîret kena ke nê endamanê xo yê ke remayî newe ra rêxistin bikera.''

Îdareyê Xoserî venga komelê mîyanneteweyî da ke çareserîyêke peyda bikero.

Zîndanê Hesekê de bi giranî cergê DAÎŞî yê Baxozî estê. Hewcedarîyê werd û şimitişî hetê Îdareyê Xoserî ra yenê peydakerdene û asayîşê zîndanî zî hetê QSDyî ra yeno caardene.