Şaristanê Kolnî yê Almanya de 15 rêxistinanê kurdîstanij û tirkîyayîjan vera hêrişanê îşxalî yê dewleta tirke yê serê  Zap, Metîna û Avaşînî eşkerayîyêka hempare daye.

Temsîlkarê KCDK-E, Goran, Komala, AvEG-KON, ATIK, Hizbî Şûî Kurdistanî, Partîya Komunîste ya Kurdîstanî, PYD, TEV-ÇAND, HDP, PJAK, KOMAW, KON-MED, Komelê Îslamîya Kurdîstanî û Komelê Êzidîyanê Kurdîstanî eşkerayîye de amade bîyî.

Eşkerayîya çapemenîye de pankartê bi nuşteyê 'Vera îşxal û qirkerdişî her ca Avaşîn, Zap û Metîna yo' û 'Wext wextê azadîye yo' ameyî akerdene.

Eşkerayîye ra dima nê kesan qisey kerd:

Hemsereka KCDK- E Yuksele Koç: 83 rêxistin û dezgehî vera îşxalan yew ê. Gerîlayî rûmetê pêro Kurdîstanî pawenê, hukmatê Herêma Kurdîstanî pê bêvengîya xo destek dano îşxalî. Ma venga NATO û Yewîya Ewropa danê ke hînî destek nêdê Tirkîya.

Temsîlkarê  Têgêrayîşê Goranî yê Ewropa Goran Babalî: Dewleta tirke îşxalker a û destkewteyanê kurdan kena hedef. Ganî ma sey kurdan vera ney xo ver bidê. 

Hemserekê Konfederasyonê Karkeranê Tirkîya yê Ewropa Suleyman Gulcan: Çawişoglu ame Almanya ra destûr girewt. Ma venga Almanya danê ke wa destek nêda nê hêrişanê îşxalî.

Temsîlkarê Komeleya Koyê Azadî: Ganî ma vera faşîzmî bibê yew, gerîlayê PKKyî vera îşxalî xo ver danê. Ganî ma gerîlayan têna nêverdê.

Temsîlkarê AvEG-KON Şafak Denîz, Temsîlkarê Hizbî Şûî Kurdistanî Mohammed Hacî Ahmed Zeba, Temsîlkarê Partîya Komunîste ya Kurdîstanî Lemane Stehn,  Sîyasetmedare Nursele Aydogan zî qiseykerdişanê xo de hêrişî şermezar kerd û paştî daye gerîlayan.

Hunermendî Seyîdxan, Dîyar û Perwan Arjîn zî tewrê eşkerayîye bîyî û hunermend Dîyarî ard ziwan ke ganî pêşmergeyî zî vera nê hêrişan têbigêrê û statuyê xo bipawê.

Eşkerayîye de plansazîya bernameyê çalakîyan zî ameye kerdene. Goreyê naye 12ê gulane de şaristanê Strasbourgî yê Fransa de rayraşîyayîşêk, verê Konseya Ewropa de çalakîya roniştişî do bêrê kerdene û her hewte joma bi 30 kesan nobete bigêrê. Çalakîkerî do endam û temsîlkaranê Konseya Ewropa reyde pêvînayîşî bikerê, waştişanê kurdan pêşkêş bikerê.

Dostê enternasyonelî yê kurdan, Yewîya Hêzê Demokratîkî, Dezgehê Kurdîstanijî do peynîya menga gulane de Bruksel de bêrê yewca û çalakîya rayraşîyayîşî bikerê. Nê çalakîyan de venga NATOyî do bêro dayene ke wa hêrişan vindarno.