Çarçewa Hemleya 'Vera îşxal û hêrişan her ca Avaşîn, Zap û Metîna yo. Wext wextê azadîye yo' de rayberîya TJK-E û KCDK-E de şaristanê Strabourgî yê Fransa de çalakîya roniştişî dîyabi destpêkerdene. Çalakîye hewteyê 3. de dewam kena.

Çalakîya roniştişî çalakîya Nobeta Edaletî ya seba azadîya Abdullah Ocalanî reyde dewam kena. No hewte dezgehanê dînîya FEDA, CÎK, Federasyonê Êzidîyan ê Ewropa, MARDEF û aktîvîstanê TJK-E yê Dusseldorfî çalakîye dewr girewte. No hewte derheqê hêrişanê îşxalî de panelêk zî do bêro kerdene.

Roja dişemeyî pê beşdarîya Endamê Federasyonê Êzidîyan Hesî Hesenî ra panelê bi nameyê 'Qirkerdişê Şingalî' ame dayene. Hecî Hesenî vist vîrî ke 2014 de DAÎŞî verê çimanê PDK û hukmatê Iraqî de êzidîyî qetil kerdî. Hesenî vat: ''Şerwanê azadîye resayî hewarê êzidîyan. Heta Şingal xoser bibo têkoşîn do dewam bikero.''

Dima zî dergeqê Qirkerdişê Êzidîyan de sînevîzyonêk ame mojnayene û hunermendê MARDEFî vejîyayî sehne ser.